EDITORYAL – Hagit sa 2016

Unyang gabii sugaton sa katawhan sa tibuok kalibotan ang tuig 2016 nga puno sa paglaom nga niining umaabot nga tuig maarang-arang na ang ilang kinabuhi.

Sa tuig 2015, daghang mga personal pagsuway ang matag usa nga giagian, adunay nilambo ug aduna say nasubo ug alang niadtong nakaabot karong adlawa ug mosugat sa bag-ong tuig, laing tsapter na usab kini sa mga pagsuway nga kinahanglang lampuson.

Sa politika, nibukal na dayon ang kainiton niini sa 2015 ug gipaabot nga karong 2016 mas moawas na gyud ang kainiton niini ini og sugod na sa campaign period sa Enero 10.

Karong tuig 2016 mag-usab og mga lider ang mga Pilipino ug nanghinaot ang tanan nga ang mosunod nga pangulo magdala og kalamboan sa nasud inay nga kaguliyang ug pagkabahin-bahin sa katawhan.

Gusto sa tanan nga ang sunod nga makalingkod sa pwesto magdala og swerte sa matag usa sa mga Pilipino ilabi na sa mga kabus aron sila mahaw-as sa ilang gikahimutangan karon.

Apan kini dili mahitabo kun ang mga tawo magpabiling ignorante ug dili gamiton ang utok sa pagpili sa ilang botaran. Unta makatilaw na ang Pilipinas og ani ug dili lang pulos pugas.

Ang unom ka tuig ubos sa pagdumala sa maayong lider mubo ra kaayo, apan taas kaayo para sa usa ka lider nga personal nga interes ug katagbawan ug di sa iyang nasud ang giuna.

Dili mahimong basulon ang uban sa kapakyasan kay dili kini mahitabo kun milihok ug naningkamot  ang usa ka tawo pagpili sa matarong.

Busa, sa pagsud sa Bag-ong Tuig angay nang usbon ang kinaiyang tinapulan ug reklamador ug angay nga mosungasong sa hagit sa kinabuhi.

Anaa sa mga kamot sa matag usa kanato ang reporma ug kabag-ohan. Gikan dinhi sa Banat News malipayong pagsugat sa Bag-ong Tuig 2016!