Nagbilin og last will and testament

Dear Atty. Divine,

Kapin na sa 70 ang akong edad ug aduna na koy gihimo nga Last Will and Testament alang sa akong properties. Gusto unta nako nga ang akong Last Will mao gyud ang sundon sa akong mga anak ug way mamentaha kanila. Apan matud pa, kinahanglan pa nga pa-aprobahan sa korte ang akong Last Will, mahimo ba kini nako nga pa-aprobahan sa korte samtang buhi pa ko or inigkamatay ra gyud nako mahimong paaprobahan nila ang akong last will? Unta imo ko nga mahatagan og katin-awan. — Jose

Dear Jose,

Ang Last Will and Testament kinahanglan nga ipaagi sa probate proceedings aron pagsuta sa korte kun ang maong Last Will nakatuman ba sa hustong rekisitos nga gilatid sa balaod, basi sa Article 828 sa atong Civil Code.

Apan ikaw isip testator, mahimo nga maoy mopasaka og Petition sa korte alang sa pag-probate sa imong Last will ug mahimo sab nga inigkamatay na sa testator ipa-probate ang maong Last Will.

Kun maaprobahan sa korte ang imong Last Will, then ang mga heirs makadawat sa unsay tukmang share alang kanila base sa nalatid sa imong Last Will. Apan ang imong kabilin ma-inherit lang nila kun wala ka na niining kalibutana. Apan kun dili maaprobahan sa korte ang imong Last Will tungod kay wa kini makatuman sa gilatid sa balaod, then ang imong kabtangan i-distribute sa imong mga heirs base sa balaod, ug susama ra nga wa kay Last Will and Testament nga gibilin kanila. Thanks and Happy New Year kanimo ug sa imong pamilya.  -Atty. Divine

* * *

Alang sa inyong pangutana, ipadala lang sa Legal Corner sa Banat News sa V. Gullas St., Cebu City or email sa [email protected] ug akong tubagon ang inyong pangutana pinaagi sa akong column matag Miyerkules, Sabado ug Domingo