Saad sa tim-os nga pag-alagad

Trese ka diyakono (deacon) sa Cebu Archdiocese ang giordinahan ni Archbishop Jose Palma niadtong Disyembre 28, atol sa pagsaulog sa Feast of the Holy Innocents o mas naila nga Innocents' Day.

Gipahinungod ang maong adlaw sa paghandum niadtong pag-massacre sa mga bata nga lalaki didto sa Bethlehem base sa sugo ni Haring Herodes.

Kini ang gihimo nga hanig sa arsobispo sa hagit niya sa mga newly-ordained deacon nga mao ang paghatag og importansya ug walay sukod nga pag-alagad sa mga kabus kinsa mao ang mas nanginahanglan sa ilang serbisyo.

Dili matukib ang gibati nga kalipay sa mga diyakono nga niabot na gyud ang gipaabot nga panahon nga masul-oban sila sa pula nga vestment sa ilang bokasyon. Dungan usab niini ang dako nga saad sa paghimo sa gitahas kanila nga responsibilidad sa pagpangalagad.

Samtang wala na tingali labing malipayon, kun dili ang ilang mga pamilya gumikan kay aduna nay mangabogar kanila sa Kahitas-an.

Tungod sa kalipay ug kahigwaos, gusto nila nga makuhaan og video ug hulagway ang seremonya hinungdan nga nagtapok sila sa atubangan. Gani ang uban “upload” gyud dayon sa social media bisan wala pa mahuman ang misa.

No offense sa mga hingtungdan, apan gumikan sa nanghinubra nga kalipay medyo mataligam-an na usahay ang ka solemne sa balaanon nga kalihokan sa simbahan.

Hinuon, nagpakita lang kini sa atong pagkatawhanon, nga timailhan nga kita mga nilalang o binuhat lang sa Labaw nga Makagagahum.