Brgy Butong, Pinamungajan, Cebu

“Maayo unta og ayuhon na ang gubaon namo nga karsada diri padung sa Brgy Abuhan kay grabe gyud kaguba, maglisod na pag-agi ang mga sakyanan, ilabi na ang mga motor.”

Brgy Inayawan, Cebu City

“Manawagan lang mi sa mga opisyal namo sa barangay nga ihatag na unta ang sweldo sa mga trabahante kay upat na ka buwan nga pinaabot, wala gyud gihatag bisa’g usa ka buwan na lang para naa mi mapalit bugas para sa among mga pamilya.“

Brgy Tingub, Mandaue City

“Reklamo lang mi kay diri sa among lugar naay mosulod nga tubig nga baho kaayo gikan aning nagtrabaho sa duol nga construction. Ang ginamit nilang tubig adto man magpundok sa among gipuy-an.”

Brgy Lunas, Asturias, Cebu

“Ang among mga opisyal sa barangay wala man gyud ni sila kabadlong o pagpakabana sa kadaghang langaw diri sa among lugar gikan sa usa ka poultry. Kuyawan mi diri nga magkasakit, labi na sa mga bata tungod sa kadaghang langaw.”

Brgy Tabunok, Talisay City

“Ngano man tawon ning mga traffic enforcer diri sa among syudad nga wala man  kabadlong sa mga nag-illegal parking atubangan sa ilang opisina, labi na ning karsada padung sa Brgy. Lagtang, samok kaayo.”

Brgy Cansuje, Argao, Cebu

“Diri sa Sitio Bayabas daghan kaayong mga langaw tungod aning poultry diri. Wala man moaksyon ang mga opisyal namo sa barangay.”

Brgy Tisa, Cebu City

“Dugay nami nga naghangyo sa among mga opisyal nga ayuhon ning among karsada diri paingon sa Mohon 2 kay grabe na kalawom sa mga libaong.”

Brgy Paknaan, Mandaue City

“Moreklamo mi bahin sa mga estambay diri sa Sitio Calderohan kay manghilabot man sa mangaging mga tawo, usahay mangulata pa ug wa’y pilion bisa’g babaye. Maayo unta’g aksyonan dayon kini sa taga barangay o ba kaha sa mga polis.”

Brgy Dunggoan, Danao City

“Batia sa pinaskuhan namo gikan sa among mga opisyal sa barangay kay wala may agas ang tubig diri, luoy kaayo mi nga mga molupyo kay wala makaluto og pang noche buena, kay way tubig nga magamit.”

Brgy Mohon, Sogod, Cebu

“Sige man lang mi’g bayad sa tubig tag P50 matag buwan pero way klarong agas. Halos kaming mga konsumidor, wa kapahimulos sa tubig matag adlaw kay way klarong serbisyo. Unta matagad kini sa labing dali nga panahon.”

Brgy Maghaway, Talisay City

“Kining among barangay, hapit na man tawgon og Brgy Baho, kay hapit sa tanang adlaw mi nag-antos sa sige’g singo sa baho sa mga basura. Dugay kaayo makuha ang mga basura nga gibutang lang daplin sa karsada, ang uban gipang-ulod na lang.”