EDITORYAL – Mga way pagpakabana

Klaro kaayo nga nagpabaya lang sa ilang katungdanan ang kadagkoan sa Department of Public Works and Highways (DPWH) tungod kay gipasagdan ra nila ang mga dagkong punoan sa kahoy nga anaa na mahimutang taliwala sa karsada.

Ang DPWH maoy nagdumala sa mga national highway, apil ang Transcentral Highway, nga mao ang karsada nga gikan sa Barangay Lahug paingon ngadto sa lungsod sa Balamban.

Daghan kaayong punoan sa dagkong kahoy nga gipasagdan ra nila nga anaa sa taliwala sa “lane” kun agianan sa mga sakyanan nga maglugsong sa Sitio Maaslom, Barangay Busay, dakbayan sa Sugbo.

Imposible nga walay mga opisyal ug kawani sa DPWH nga nakakita sa maong talan-awon? Kanus-a man sila mohimo og aksyon niini aron makuha ang dagkong punoan sa kahoy taliwala sa karsada, unya na ba kun may mangamatay?

Kun nangisog man si Mayor Michael Rama sa pagpaguba sa median structure didto sa taliwala sa Katipunan Street kay maisip nga traffic hazard, mas grabe pa ka peligro ang mga kahoy nga anaa gyud taliwala sa karsada sa Sitio Maaslom, Busay.

Bisan gani ang pagpintal na lang unta og yellow aron modan-ag ang punoan sa kahoy panahon sa gabii, wala kini buhata sa mga kawani sa DPWH.

Ang kadagkoan sa DENR dili na unta kay maghuwat pa nga mangayo kanila og pagtugot ang mga opisyal sa DPWH nga maputol ang mga kahoy kun sila naghuna-huna pa nga malikayan ang disgrasya.

Bisan gani tingali ang mga opisyal sa barangay wala magtagad niining maong sitwasyon. Silang tanan walay mga pagpakabana aron nga malikayan ang aksidente nga mahimong mokalas og kinabuhi.