Lingia ang mga BHW

Maayo kaayong moduwa sa balaod ang mga kandidato sa pagka-presidente. Ang Commission on Elections midawat na sa certificate of candidacy ni Mayor Digong Duterte, apan “without prejudice” sa posibleng diskuwalipikasyon kun mapamatud-an.

Tungod niini, ang kampo ni Senador Grace Poe miawhag sa Comelec nga kun gidawat niini ang COC ni Digong, angayang dawaton usab ang iyaha bisan kaduha na siya gi-disqualify sa duha ka Division sa Comelec tungod kay American citizen.

Wala sila’y gipasanginlan. Sa giatubang suliran nilang Duterte, Poe ug bisan ni Bise Presidente Jejomar Binay, si Mar Roxas ang gipasanginlan nilang nagpa-propaganda.

Nganong mabalaka man sila ni Roxas nga tag-as man kaha ang ilang survery rating? Sa ato pa, wala diay sila motuo nga ikaupat ra si Roxas?

Mikalma na hinuon si Duterte human masaway sa mga tawo ang ilang lalis ni Roxas, human sa hagit sinagpaay, sinukmagay, ug pinusilay.

Apan sa dihang gihagit ni Roxas si Digong og debate, dili man kini makig-atubang ug nanghambog hinuon nga kinahanglang mo-ikaduha una si Roxas aron makigdebate siya.

Ang debate importante aron makadungog kita sa mga punto sa mga presidentiables. Dili importante ang survey rating aron mag-debate ang mga kandidato.

* * *

Nagduko lang intawon ang mga Barangay Health Workers sa siyudad sa Sugbo nga naghunahuna sa ilang demalas niining Pasko.

Sa tag-P30 mil matag empleyado nga bonus nga gihatag ni Mayor Mike Rama, wala gyu’y labot ang mga BHW. Wala gyu’y giandam alang kanila bisan P3 mil lang nga igong ikapalit og noche buena.

Nganong ingon man niini ang Cebu City Hall karon? Asa man ang kaangayan?

Samtang nagsadya ang kadaghanan (gawas sa pipila nga wala modawat sa P30 mil nga bonus) tungod kay makatuyoktuyok na sila sa mall karong Pasko, adunay grupo sa mga nagserbisyo sa publiko nga nagdawat lang gani og gamay kaayong honorarium nga nagbakho sa daplin kay wala lingia ni Mike Rama.

Asa man ang iyang kasingkasing alang sa mga BHW?

* * *

Wala na gyud makakita ang mga Mandauehanon kang Kongresista Luigi Quisumbing nga naglibot sa mga sitio aron mangampanya.

Kaniadto pa nga gitagna nga kapoyan gyud si Luigi sa kinabuhi sa ehekutibo, kay gawas nga dako siya nga pagkatawo, adunay estorya nga nag-antos kini sa “gout” busa maglisod og lakaw og layo.

Kun mao kini, sayon ra kaayo ang pagdaog ni Lolypop Ouano-Dizon nga wala’y puas ang pagduaw sa mga sitio?

Kun wala pa lang unta magpadala si Luigi sa hulhog ni Jonas Cortes, puwede ra gyud unta siyang magrelaks sa kampanya. Pero kun si Dr. Paulus Cañete ang ikaatbang, posibleng panington usab.

Kugi na kaayong nagtuyok si Paulus sa mga sitio, ilabi na sa Cordova ug Consolacion diin ang mga tawo nasuko sa “lone district” proposal ni Jonas.