Ngano nga si Duterte?

Sa Facebook, trending ang sinagpaay nilang Davao City Mayor Rodrigo Duterte ug kanhi DILG Secretary Mar Roxas.

Sidelights lang ang laing presidential aspirants nga sila si Senador Grace Poe ug Vice-President Jejomar Binay, ug wala maapil si Senador Miriam Defensor-Santiago. Nawingig si Roxas sa kusog nga sagpa ni Duterte.

Sa labing uwahing survey alang sa mga presidential aspirants, si Duterte mao nay nag-una tali sa laing upat nga modagan sa pagka-presidente.

Tawgon usa nato sila og presidential aspirant kay dili pa sila matawag nga kandidato hangtod nga magsugod na ang campaign period ug hangtod nga makapagawas na ang Comlec sa opisyal nga listahan sa mga kandidato alang sa election sunod tuig.

Kalit nisulbong ang popularidad ni Duterte ug nag-una siya sa survey sa dihang nasang-at na ang iyang Certificate of Candidacy, human niya gibalikas ang Santo Papa, human pasanginli si Mar Roxas nga wala makagradwar sa Wharton School of the University of Pennsylvania, sa palpak nga pagpangandam sa dakong epekto sa bagyong Yolanda ug sa ilang hagit og sinagpaay.

Hinoon ang maong survey gihimo niadto pang Nobiyembre 11 ug 12,  2015. Nabaniog ang pangalan ni Duterte tungod sa iyang kaprangka nga manulti ug sa iyang track record nga maoy mangunay ug mopakita ngadto sa iyang mga constituent sa Davao City sa pagdisiplina sa mga taxi driver nga molapas sa mga lagda sa trapiko, sa mga drug pusher nga iyang hatagan sa ultimatum sa pagpahawa sa Davao City ug kun magmagahi gani, sa sunod adlaw makit-an na lang nga patay na, sa pagpakaon og papel sa usa ka tawo nga gipasanginlang nangolekta sa abangan sa yuta nga dili iya.

Dunay usa ka turista nga nisupak sa "no smoking ordinance" sulod sa usa ka restaurant sa Davao City nga napugos sa pagtulon sa upos sa sigarilyo dihang gipagawsan ni Duterte og armas, ang pagsantako ni Duterte sa mga kidnappers, estriktong pagpatuman sa curfew, ang pagdili sa mga pabuto sa pagsugat sa Pasko ug Bag-ong Tuig ug daghan pa nga pagdisiplina sa pagpatunhay sa kahapsay ug kalinaw sa Davao City.

Kining tanan pulos napublikar ug nahibaw-an sa taga Davao City ug hapit sa tibuok nasud tungod sa media. Ang mga pintok nga sinultihan ug wala’y lipud-lipod nga pag-angkon sa iyang pagkababaero maoy gikuhaan og base sa mga nakombinser nga makahatag og dakong kausaban ug mapitol ni Duterte ang nagkalapad nga pangurakot sa gobiyerno, sa nagkadaghang badlungon ug sa nagka-abusado ug pagkawalay disiplina nga mga tawo.

Ang mga nangita sa dinalian nga kausaban naghigwaos ug nag-alindasay sa pagpangita og tawo nga dunay kaisog sa pagsilot sa mga badlungon ug dili mahadlok mopatuman sa balaod bisan kinsa ang hingtungdan.

Sa mga dumadapig ni Duterte siya ang tubag!