Advantage ni Rama
Human migawas sa pamantalaan ang hulagway ni Cebu City Mayor Michael Rama nga nagluhod sa iyang pagpakig-atubang sa mga empleyado sa City Hall mahitungod sa iyang pagkasuspenso, adunay laing letrato nga migawas sa media nga nagpakita ni Rama nga nagsakay og jeepney nga pasaheroan.
Tungod lagi sa iyang pagkasuspenso, suspendido usab ang iyang paggamit sa iyang service vehicle sa City Hall. Mao nang nagsakay na lamang og jeepney si Rama usa ka higayon niana sa iyang pagbiyahe.
Apan alang sa uban, ilabina sa iyang mga kontra sa pulitika, klaro nga political gimmick lamang kadto sa mayor, kinsa suspendido og duha ka bulan sa Malacañang. Imposible kuno nga walay laing sakyanan si Rama gawas sa iyang service vehicle.
Siguro alang sa mayor, iya kadto nga gibuhat isip pagsanong sa suspension order. Kini gawas sa tinguha sa iyang kampo nga mohakot og simpatiya sa katawhan sa dakbayan sa iyang giingong dili makiangayon nga pagtratar sa administrasyong Aquino kaniya.
Ambot kun mosaler ba sa masa ang iyang pagluhod-luhod ug pagsakay-sakay sa jeepney. Siguro adunay misimpatiya kaniya, ilabina kadtong iyang mga kaalyado sa pulitika. Kay lagi sama siya sa langgam nga naputlan og pako.
O basin nga overacting ra usab kaayo ang mayor alang sa uban. Kini ilabina kun sige kini niya nga buhaton. Ug nga himuon na lamang hinuon siya nga kataw-anan niadtong nagtuo nga pulos lamang atik ang tanan.
Kun ako pay Rama, akong igahin kining duha ka bulan nga suspensiyon alang sa pagbaktas sa kabaranggayan aron pagkuha sa pulso sa katawhan mahitungod sa iyang kandidatura alang sa eleksiyon sa Mayo.
Sa laing bahin, advantage usab sa kandidatura ni Rama ang iyang suspensiyon. Kini tungod kay mas mahatagan niya og dako nga atensiyon iyang kampanya alang sa ikatulo nga termino diha sa City Hall.
Sa akong nakita, dili mosaler ang luhod-luhod ug saksay-sakay sa jeepney ni Rama sa iyang politikanhong kampanya. Mas maayo pa nga magsugod na siya’g suhid sa mga barangay karon kun gusto gayud siya nga modaug sa sunod piniliay.
- Latest
