EDITORYAL - Pagtalikod sa kaakohan

Husto kaayo ang punto ni kanhi Department of Justice Leila de Lima nga di kinahanglang paubsan pa gyud ang age of discernment gikan 15-anyos ngadto nalang sa 9-anyos alang sa mga batang nalambigit karon sa krimen.

Daghan gyud ang moisa ang kilay niini ilabi na niadtong mga nabiktima sa mga linuog nga krimen ug kadtong mga biktima sa petty crimes nga maoy sagad kalambigitan sa mga bag-ong tubo.

Gani sibaw na kaayo karon ang panawagan ilabi na gikan sa pipila ka law enforcement agencies og nagtinguha  paubsan pa gyud ang basehan sa edad sa mga bata aron matawag silang  makasabot na kung unsay sayop ug husto.

Apan sa panan-aw ni de Lima, angay luwason ang mga batang natanggong niining krimen tungod kay sila mga biktima sa sitwasyon ug dili makatarunganon ang rason nga nagkadaghan na ang mga batang gigamit sa mga sindikato karon.

Mahimong daghan ang dili makauyon sa panglantaw ni de Lima, apan sa kasingkasing sa mga batang nakadena na karon sa mga sindikato posibleng nagsinggit sila pagpangayo og tabang aron sila luwason.

Daghan pang mahimo ang gobiyerno ug ang publiko alang niining mga bataa , ang kulang lamang mao ang pagdawat sa responsibilidad.

Ang panawagan sa pagpaubos sa age of discernment usa ka pagtalikod sa responsibilidad  sa mga law enforcement agencies aron protektahan ang mga bata. Wala na diay sila’y mga kasingkasing nga salbaron pa kining mga bataa nga kung buot huna-hunaon biktima sila sa kakabus, kakulang sa edukasyon, nabiktima sa mga sindikato ug sa kataposan, ang mobiktima kanila mao pa mismo ang atong mga law enforcement agencies.

Nagtuga-tuga sila og panday sa Republic Act 9344 apan kuwang ang gigahing pundo aron magtukod og rehab centers sa mga bata aron sila matarong.

Dili ba kini supak sa RA 7610 nga laing balaod nga nagprotihir sa mga bata gikan sa pangabuso?