Si Mike sa jeepney

Kay wa nay sakyanan, nakit-an na lamang si suspended mayor Mike Rama nga nagsakay lamang og jeepney sa iyang pagtambong sa kalihokan sa senior citizens niadtong miaging adlaw. Sama sa ordinaryong tawo miplete si Mike ug gilibre ang mga tinun-an nga pasahero nga iyang gikasakay.

Si kanhi mayor Tomas Osmeña nga iyang makaatbang sa piniliay igo ra sa pag-ingon nga mas maayo na lang ning gihimo sa mayor kay sa iyang paglaag-laag didto sa gawas sa nasud.

Ang kanhi mayor nakasabot sa gihimo ni Mike tungod kay mao pud ni ang iyang gihimo sa dihang bag-o pa siyang miabot gikan sa gawas sa nasud ug nagpapili pagka-mayor sa Sugbo. Si Tomas nagsakay-sakay pud kaniadto sa jeep aron mailhan sa mga tawo kuyog si Alvin Garcia kun wala masayop ang nagsulti nako ani.

Ang pagsakay ni Mayor Mike sa jeepney usa ka paagi sa pagpangampanya nga ang tumong ug tuyo mao ang pagpaduol sa masa.

Dinhi gigamit ni Mayor Mike ang iyang suspension sa pagbaligya sa iyang kandidatora ug nakahimo siya niini sa way pagpupanagana tungod kay putol man ang iyang koneksyon sa City Hall.

Ning puntoha gipasuya ni Mike ang mga tawo nga nakaingon sa iyang suspension ug gipadad-an og mensahi nga dili siya ang tawo nga madalidali sa pagpukan.