EDITORYAL – PUJ nga mura’g lungon

Tinuod nga daghang public utility vehicles sama sa mga PUJ, bus, ug mga trak de-karga nga gubaon na kaayo apan padayon lang gihapon nga gipadagan-dagan sa ilang mga tag-iya diha sa mga karsada.

Nahukman sa kadagkoan sa Department of Transportation and Communications (DOTC), pinaagi sa Land Transportation Franchising and Regulatory Board (LTFRB), nga wad-on na ang mga public utility vehicles nga nag-edad og 15 ka tuig.

Dinhi misinta ang mga drayber kay moresulta kuno nga mawad-an sila og trabaho. Wala nila huna-hunaa nga kun ipatuman gayud kini sa kagamhanan, ang mga operators mapugos pagpalit og bag-o nga sakyanan.

Wala maghuna-huna kining ubang drayber nga para sa ilang kaayohan, ug ingon man sa mga pasahero ang tumong sa kagamhanan. Nagmaneho sila og mga PUJ nga ang uban wala gani hand brake nga magamit kun dili motrabaho ang foot brake sa ilang mga sakyanan.

Ang angay unta nga buhaton sa DOTC ug LTFRB mao ang pag-estrikto sa kampanya sa pagpuo niining mga sakyanan nga giisip sa uban nga “nagdagan nga lungon” diha sa karsada kay mga dunot, wala nay atiman sa mga tag-iya nga kuwarta ray giapas.

Daghang mga PUJ nga masakripisyo intawon ang mga pasahero nga halos mapakong na lang kay mubo ang atop ug maglisod pagsakay kay mag-abot ang masig ka tuhod sa mga mag-atbang paglingkod.

Adunay pipila ka PUJ  nga mura’g lungon na tan-awon kay mubo kaayo’g atop. Kini maoy angay’ng tagdon sa LTFRB pinaagi sa paghimo’g lagda kun unsa ang gitas-on sa mga atop sa mga PUJ aron dili masakripisyo ang mga sumasakay.

Daghang mga public utility vehicles nga nag-edad na og 15-anyos apan nindot pa kaayo kay tinagad sa ilang mga tag-iya ug dili kini angay’ng pahunongon sa pagpamasahero.