Paghawan sa tunok sa tul-id nga dalan

Ang labing sayon ug segurado nga pag-angkon sa kalamposan mao ang paghawan sa mga tunok diha sa agianan. Ingon niini karon ang nahitabo sa natad sa politika sa nasud nunot sa nagsingabot nga 2016 elections diin kinsa kadtong anaa sa poder ug mga kaalyado mao ang adunay lampas o karit nga maoy gamiton sa pagputol sa mga sagbot nga nakaali sa giingon nila nga tul-id nga dalan.

Tungod sa pagdalidali ni Bise Presidente Binay pagdiga sa iyang baraha pagpapili pagka presidente, ang resulta gibombardiyo siya sa mga kaso hinungdan sa paghagba sa iyang ratings.

Si Senador Grace Poe nga nag-una sa survey ang sunod nga nabiktima kinsa naigo sa disqualification case tungod sa iyang citizenship nga misangpot pagkanselar sa Commission on Elections (Comelec) sa iyang kandidatora.

Karon nga si Davao City Mayor Rodrigo Duterte nahimo na nga presidential aspirant, siya na sab kaha ang isunod?

Bisan pa man sa mga pagsaway nga gibato kang Digong gumikan sa iyang pagkahimalikas nga dali ra kaayong makalitok og "Pu..... Ina", apan murag wala kini makapatarug sa iyang mga dumadapig. Si Mar Roxas lang ang limpyo pa og baraha kinsa maoy gituboy nga manununod sa "tuwid na daan" ni PNoy. Apilon na lang nato sila si  Senador Santiago ug Roy Seneres nga nangiwit sa survey.

Sa local politics, si Cebu City Mayor Mike Rama ang labing ulahi nga casualty human gipahamtangan og 60 ka adlaw nga preventive suspension sa Malacañang.

Gisundan niya silang mayor Junjun Binay sa Makati City ug Mayor Nelson Garcia sa Dumanjug nga pulos kontra sa Liberal Party.  Aduna na bay sakop o kaalyado sa administrasyon nga nasuspenso? Kinsa kaha ang sunod nga maigo sa hait nga lampas o karit sa politika? Atangi!

Diha sa bakasyon

Sanag na kaayo ang mga mata sa akong mga tinun-an sa REED 20 kay lagi hapit na kuno ang Christmas break. Bakasyon na usab ug wala nay klase. Kun ang uban ang mahimong magpahimulos sa kagahub mas pilion ko pang mag-inusara sud sa lawak aron hagpat- hagpaton ang mga kasinatian ug mga panghitabo sa kinabuhi.

Kay pinaagi lamang niini maggambalay ang han-ay sa panaw diha sa atong mga pagpili. Mahinungdanon kaayo ang paghilom aron tagamtamon ang makabungog nga kadato sa kamingaw ug labina aron hinumdoman nga ang kinabuhi mubo ra man diay ug kuyog sa kamubo niini ang pag-ihap sa nahabiling gutlo sa pagpuyo sa kinabuhing mapuslanon. Niabot ang akong higala dala niya ang serbesa. Apan igo lang kong mitutok sa botelya. Ako siyang giubanan diha sa iyang pagsaulog pinaagi sa paghubog niya ug human siya maloro ug nipauli sa ila, nahibilin akong nag-inusara. Gipunit ko ang libro sa sikolohiya sa pamasin nga makakita ako og kahulogan sa daghan kong mga pangutana.

Kadato sa Sugbo!

Ang grabeng traffic ug ang kanihit sa mga pangpublikong sakyanan mao nay “new normal” dinhi sa Sugbo. Apan pait kini nga matang sa kabag-ohan tungod kay inay sa kalamboan ang padulngan, mahulog unya kini nga umento sa kunhod.

Bag-o ra nga gideklarar sa Commission on Audit nga ang Sugbo ang labing adunahan nga probinsya sa 80 ka probinsya tibuok nasud.

Matud sa COA, adunay P28.18 billion nga equity ang probinsya sa Sugbo, kasagaran nga nilangkob sa kadato sa Sugbo mao ang real estate properties. Niini nga kasagaran ania sa dakbayan sa Sugbo nga dunay taas nga market value. Apan ang dili masiguro sa COA kun natagamtam ba sa kapin kuwatro milyones ka Sugbuanon [sa datus niadtong 2010] ang kadato sa Sugbo?

Niadtong Sabado sa gabii, sanglit ang new normal naman ang kahuot sa dagan sa trapiko, wala nako damha nga akong malakaw ang gikan sa highway sa Subangdaku diha tungod sa San Miguel Corporation hangtod sa ABS-CBN studio sa Barangay Jagobiao, Mandaue City.

Gikan sa Ayala, nisakay ko og PUJ nga may rota nga Ayala-Maguikay. Nihukom ko nga mag-jeep tungod kay taas kaayo ang linya sa mga nag-atang og taxi. Sa PUJ daghan man tuod ang mga pasahero nga nag-atang apan dili ka dugay nga maghuwat.

Gikan sa Cebu City hangtod na sa pagsulod sa dakbayan sa Mandaue gikan sa Innodata sa highway hangtod sa Subangdaku, "moderate" pa ang dagan sa mga sakyanan, sanglit pasado alas saes pa sa gabii.

Wala pa nigawas ang dagkong mga sakyanan nga usa sa makabara sa dagan sa trapiko. Apan sa akong pagkanaog diha  tungod sa SMC naabtan ko og usa ka oras sa pag-inatang og PUJ padulong Consolacion.

Pulos puno ang rota nga Consolacion gikan Cebu City. Ma-PUJ o taxi pulos puno. Daghan mi'ng nag-atang og masakyan.        Human sa usa ka oras nga paghuwat, nihukom ko nga molakaw gikan sa SMC hangtod sa Jagobiao nga may lima ka kilometros nga gilay-on. 

Dunay poste sa kilometrahe diha sa nagsanga nga dalan A. del Rosario ug MC Briones Avenue nga 6 km hangtud sa ABS-CBN nga 11 km.

Apan inay sa sidewalk ko moagi diha ko kilid sa dalan nilakaw. Ang niokopar sa sidewalk vulcanizing shop, giparada nga mga motorsiklo, lamesa sa mga imnanan, naninda og barbeque ug may nanglaba pa.

Mao nga nakapangutana ko kun tinuod ba nga number one ang Sugbo sa mga malambuon nga probinsya sa tibuok Pilipinas. Hain man nga dapita ang paglambo?

Samtang nanuyhakaw ang tag-as na kaayong mga building, nagkadaghan ang dagkong mall, nagkadaghan ang dunay nindot nga mga sakyanan apan nganong mas daghan man ang dili makasakay sa public transport? Nganong gipuy-an man sa mga informal settlers ang mga sidewalk? Nganong dili man makita sa panginabuhian sa mga Sugbuanon, kahimtang sa pagpuyo ug sa batakan nga serbisyo ang gipanghambog nga kadato sa Sugbo?