EDITORYAL – Kampanya diha sa social media

Wa pay mahimo ang Commission on Elections kabahin niining nagpasad karon nga mga matawag natong campaign ads diha sa nagkadaiyang mga social networking sites.

Usa sa ilang rason mao nga kuwang sila og tawo aron makaatiman niini. Pirme na lang gyud ingon niini ang ilang rason. Pirmeng uwahi ang mga ahensya sa gobiyerno bisan og aduna pa silay igong pundo.

Dili exempted niini ang Comelec, kay hasta sila uwahi sa kalamboan ilabi na sa teknolohiya ug ang nahitabo kanila reaksyon na lang ug dili aksyon.

Karon nagpasad na ang mga nagkadaiyang campaign posts diha sa social networking sites ilabi na sa Facebook.

Hinuon way nakasiguro kun gikan ba ni mismo sa mga kandidato apan dili imposible nga kini gikan sa ilang mga campaign managers ug gipakatap kini sa ilang supporters nga libre.

Lahi sa tradisyonal nga campaign materials nga ipanghatag ug ipapilit bisan asa o sa mga designated campaign material posting areas, ug isibya sa kahanginan ug telebisyon wala  kini limitasyon.

Apan sa social media mas lapad ug mas layo og maabot ang mensahe ug labaw sa tanan dili dali-daling mawala kay basta sakyan lang sa mga netizen wala kini hunong sa pagkatap. Kini maoy hinungdan nga gigamit na kini   sa mga kandidato aron ipaila ilang kaugalingon. Gigamit usab kini pag-atake sa ilang mga kaatbang.

Matud pa sa regional director sa Comelec-7 nga si Atty. Rafael Olaño atol sa pagdapit kaniya sa Cebu Citizens Press Council sa miaging semana, kuwang sila sa tawo aron makapokus niining bag-ong paagi sa pagpangampanya pinaagi sa internet.

Ang solusyon niini, kinahanglang mokuha ang Comelec og dugang mga tawo sa sunod nga eleksyon aron maoy tahasan sa pag-monitor aron ma-regulate. Lisod ni nga tahas apan kun gusto silang makaapas , kinahanglang ilang seryuhon ang gahom sa social media.