Ang sugal sa kinabuhi

May mga sitwasyon nga tingali wala kita masayod, nga ang atong gibuhat, nakapa-aghat kanato sa pag-apil nga hangtud nagumon na kita sa sugal. Sa sinugdanan, maayo ang atong intensyon kay lagi aron kita  makatampo sa kalihokan sa pagpundo og salapi alang kunohay sa kaayohan sa kadaghanan.

Ok man sab kun mao ni ang atong tinud-anay nga katuyoan. Apan mas molabaw gayud ang motibo sa ihatag nga daku'ng kantidad katumbas sa pagdaug sa puhonan sa pagpalit og tiket. Usa ra'y modaug apan milyones ang nangaminghoy sa kapildihan. Kalagmitan ang uban permi may gimintin nga dakong puhonan pagseguro nga may dakung tsansa matungnan nga makadaug.

Apan sa kadugay nga  panahon, diha pa nakaamgo nga hilabihan na diay kadaku sa nahiaguman, ang makapainutil nga kapildihan. Unsaon man ang sugal nga gihunat, wa man kita’y gahum o katakos nga mamaniobra ang kadaugan. Mao ni ang kapait sa sugal, nga di ni nimo makontrol aron ikaw seguro modaug.

Kun ato'ng giatubang mao pa ang sugal sa kinabuhi, mas 99% ka pa makaseguro nga modaug. Kay binugtong man nga mag-inusara ka ra pagsugal- nga ang kontra mo mao ra man ang imong kaugalingon. Ikaw ra ang modiskarte sa kadaugan mo segun sa imong kakugi ug stratehiya sa pakigbisog.

Kun buot ka'ng modaku ang imo'ng maani nga pagdaug, ihurot ang kusog kutob sa lahutay, aron ang gidamgo'ng makapalipay nga kadaugan, magpabilin kini sa kinabuhi nga kanunay ka madaugon sa pangandoy mo ning kinabuhia. Apan ang kusog nga imong isugal, dili ka gihapon modaug kun wa kay lahutay.

Ang kusog, lahutay ug pagtuo maoy labing gamhanan nga seguro ka gayud modaug sa kinabuhi, kun ang tanan atong ihangyo o isalig sa kahitas-an. Kay Siya ang gamhanan nga tinubdan sa kinabuhi, nga mao'y yawe sa pagdaug.