Ang peanut butter doctrine

Gipasanginlan ni Senador Grace Poe sila si Bise Presidente Jejomar Binay ug Mar Roxas nga maoy responsable sa iyang pagka disqualified sa pagpapili pagka presidente sa eleksyon sunod tuig.

Ang senador nagkanayon nga ang duha nga iyang gipasanginlan mao ang mabulahan kun hingpit na gayud siya nga ma-disqualified sa pagpapili  sa labing taas nga katungdanan sa nasud.

Sa nasayran gi-disqualify sa second division sa Commission on Elections si Grace Poe sa iyang pagka kandidato tungod kay kulang pa siya og pila ka buwan aron mahimong napulo ka tuig ang iyang pagpuyo sa Pilipinas.

Usa sa mga kuwalipikasyon sa mag-presidente mao nga nakapuyo siya bali’g napulo ka tuig sa Pilipinas sa wala pa ang piniliay nga siya magpapili.

Si Mar Roxas miangal sa pasangil ni Poe tungod kay wala siya’y labot sa pagka-disqualify sa babaye’ng senador. Matud ni Roxas nga wala siya ug dili sila kuyog ni Poe sa dihang iyang gipirmahan ang iyang sertipiko de kandidatora sa pagka senador nga maoy gibasehan sa Comelec sa disqualification.

Ang kampo ni Binay, pinaagi  sa tigpamaba niini nga si Mon Ilagan mibasa sa ilang tubag ngadto sa media ug nanghimakak sa pasangil.

Ang pasangil ni Grace Poe ngadto kang Mar Roxas ug Binay mahulagway nako nga sama sa doctrina sa balaod nga gitudlo ni kanhi Sandiganbayan Presiding Justice Edilberto Sandoval nga gitawag niya og peanut butter doctrine.

Ang peanut butter imo ning ipahid isip palaman sa pan nga imong kan-on. Mao ni karon ang gihimo sa senador. Iyang gipamahid sa uban ang iya mismong kapalpakan ug kasaypanan.