Ang kaabtik sa maluyahon (1)

Samtang nangobserbar ko sa mga pasyente nga magpatambal sa klinika sa TCM acuwellness. Usa ni ka tradisyonal nga medisina sa Intsek, nga dugay na’ng gipraktis sukad pa sa karaa’ng panahon sa Tsina. Nalingaw ko’ng naluoy nila, sa diha’ng tanan sila akong nahinabi. Og nakaingon ko’ng daghan pa gyud ang kulang sa edukasyon, aron unta magamit sa pagbaton og maayong panglawas.

Di nato sila mabasol ngano naingon niana kaluyahon ang ilang kahimtang. Kay mao ra ma’y naandan ang naabot sa ilang mga panghunahuna. Aduna gani uban nga batan-on pa apan mora luyahon na sama sa  natigulang na ang pisikal ug ang iyang panglihok. Mao na la’y nahibilin ang kaabtik sa paglaum nga siya kaloy-an sa Kahitas-an, nga mabalikan sa kabaskog ang panglawas.

Sagad nila gikan na sa mga ospital, nasagmuyo kay gihimo na ang tana’ng paagi sa mga medikal praktisyoner, apan pabilin gihapon ang ilang mga balatian, nga may konsuylo nga kanunay lang magmintin og tambal, aron di mograbe. Apan ang hingtungdan, sa kadugay’ng panahon wa gihapo’y nasinati nga alibyo.

Busa, bisan kita kun maluyahon na tungod sa gihambi’ng mga sakit, buot nato nga ang daginoto’ng kaabtik, magamit sa paghimo’g bisa’g unsa’ng paagi nga mamasin pa nga mahaw-as sa pag-antus sa kakulian sa  panglawas.

Mao nga bisa’g nagkalisud, naningkamot intawon makaabot sa skedyul sa pagpanambal sa klinika. Kay matud nila, may nabalitaan sila’ng mga masakiton apan karon nakita nila nga may milagro o may paglaum pa nga sila usab  makapahimulos pagbalik sa kabaskog, nga maalibyo ang ilang mga gipamati.

Kadto’ng mga maluyahon nga nakabatyag na’g kaabtik, permi na mobisita aron hingpit mamonitor ang ilang kaayohan. Nga nagda pa’g sakop sa pamilya, bisag way gipamati, naneguro lang sa pagpakondisyon sa lawas nga di masakit.