HIV-AIDS kada oras!

Ingon niini ka grabe ang paspas nga pagkatap sa sakit nga Human Immuno-Deficiency Virus (HIV) diin sa ngadto-ngadto mahimong full-blown nga Acquired Immune Deficiency Syndrome (AIDS).

Kini ang gipahibawo sa kadagkoan sa Philippine Catholic HIV-AIDS Network kon PhilCHAN atol sa gipatawag nila nga press conference kaniadtong Disyembre 1.

Ang kalihukan giatol nga ang kalibutan nag-obserbar sa World Aids Day. Tiaw mo, dinhi lang sa Sugbo, moabot na sa 1,700 ka tawo ang nataptan sa naasoy nga balatian.

Kun sa nanglabay nga katuigan kada semana o kada adlaw adunay magpositibo sa HIV, apan karon base sa talaan, adunay matud pa magpositibo sa HIV kada oras base sa resulta sa HIV tests.

Ang dakbayan sa Sugbo maoy nag-una sa mga dapit sa tibuok nasod sa mga Injecting Drug Users kon IDU nga natakboyan sa sakit.

Nagpasabot kini nga nakuha nila ang HIV gikan sa “sharing of needles o syringes” sa mga injectable drugs. Laing hinungdan sa pagkatap sa sakit ang tira pasagad nga pagpakighilawas ni bisan kinsa.

Ang mas makapaalarma karon mao kay nagkabata ang edad sa mga nataptan sa HIV. Matud pa hilabihan ka agresibo nga kinaiya ug kagahi sa ulo.

Apan may mga inosente usab nga nabiktima lang sa kahigayonan, sama sa mga bata. Pipila ka buwan ang nakalabay adunay 29-anyos nga inahan nga namatay sa AIDS dinhi sa dakbayan sa Sugbo.

Nasuta usab nga nagpositibo sa sakit ang duha niya ka anak nga nagpangedaron pa og dos ug nuybe-anyos. Kini ang makapanglimbawot sa balhibo nga problema ang gi-"take for granted" lang sa kagamhanan, sa simbahan ug mismo sa katawhan.

Kun awareness ang hisgotan, nasayod na man seguro ang tanan sa kabangis niining balatian apan ang kadaghanan nagpakabuta-bungol gihapon hangtod nga sila na gyud ang mataptan sa HIV-AIDS, simbako lang.