EDITORYAL – Botante mangahadlok

Ang pagpangrakrak og bala ug pagtira og rifle grenade paingon sa nag-convoy nga sakyanan nila ni Dumanjug Vice Mayor Efren Guntrano Gica kaniadtong Biyernes dili na maayong tilimad-on.

Bisan pa og walay kalabotan ang politika sa maong hitabo, apan maklaro na nga may grupo na diay sa mga armadong tawo nga anaa naglihok sa kabukiran sa Dumanjug.

Makapalisang kini sa mga botante kay ang maong pundok mahimo man nga bayran sa mga politiko nga makaabot sa ilang presyo aron hasion ang mga botante nga supporter sa kontra.

Abtik kaayo nga nakapasangil si Dumanjug Mayor Nelson Garcia nga “ambush me” ang maong hitabo nga nagpasabot nga buhat-buhat lang kadto nila ni Vice Mayor Gica.

Gusto lang kuno nga ipalutaw sa iyang bise mayor, nga maoy ikaatbang niya pagdagan pagka mayor karong sunod tuig, nga siya giatake aron maluoy kaniya ang mga botante.

Apan karong may mga dinakpan na ang kapolisan ug nakuhaan pa og armas, angay tingali nga tak-umon usa ni Mayor Garcia ang iyang baba.

Human gyud sa pagpamanhig, si Vice Mayor Gica wala gyud gani magduda nga may kalambigitan sa politika ang pagbanhig kaniya kay nagtuo man siya nga naggumikan kini sa hugot niyang kampanya sa ilegal nga drugas sa Dumanjug.

Angay’ng magpasalamat ang kapolisan sa aktibo nga pag-abag sa mga lumolupyo sa Barangay Masa nga mitug-an kanila nga nakaila sila sa usa niadtong mga nangrakrak.

Ang unang dinakpan giingong maoy nakagiya nga masikop sa kapolisan ang uban nga mga kauban ug misangpot sa pagkasikop sa laing duha nga nasakmitan gyud og armas, ingon man cellphone nga may text messages kabahin sa ilang pagpamanhig.