Kalidad sa mga Presidentiables

Dakong hagit sa kahamtong sa mga botante ang pagpili sa haum nga mahimong presidente sa nasud sa eleksyon sunod tuig. Kapin sa lima ka buwan na lang ug hukman na sa katawhang Pilipinhon kinsa tali sa 130 ka presidential aspirants ang mahimo nga presidente.

Wala pay hingpit nga listahan ang Commission on Election sa opisyal nga mga kandidato ug wala pa usab silay nadeklarar nga mga nuisance candidate.

Ang labing bag-ong desisyon sa COMELEC Second Division mao pa ang pagkanselar sa Certificate of Candidacy ni Senador Grace Poe sa pagkandidato pagka-presidente tungod kay kuwangan pa siya sa iyang residency. Ubos sa batakang balaod gipangayo ang napulo ka tuig nga residency sa usa ka kandidato pagka-presidente.

Sa kaso ni Poe, matud sa Comelec Second Division, siyam ka tuig ug unom ka buwan pa lang nga nagpuyo si Poe sa Pilipinas base sa iyang COC niadtong 2013 diha nga midagan siya pagka-senador. May nag-ung-ong pa nga laing disqualification ni Poe sa issue nga siya dili usa ka natural-born Filipino tungod sa iyang pagka-foundling o pagka kinit-an o pinunitan.

Wala pa makahuman ang Comelec paghashas sa 130 nga nisang-at sa ilang mga COC sa pagka-presidente.  Bugtong si Martin Dino pa lang sa Partido Demokratiko Pilipino-Lakas ng Bayan kon PDP-Laban party ang niatras sa iyang pagkandidato nga gipulihan na usab ni Davao City Mayor Rodrigo Duterte.

Sa 130 ka presidential aspirants, lima ra ka pangalan ang ilado kaayo. Sila si bise-presidente Jejomar Binay, kanhi DILG secretary Mar Roxas, Senador Miriam Defensor-Santiago, si Duterte ug Poe.

Apan silang lima pulos dunay mga karakter ug mga isyu nga gipas-an nga angayang tarungon sa pagtimbang sa mga botante. Si bise-presidente Jejomar Binay, dunay daghang kaso nga graft and corruption, may isyu usab siya sa pagka-babaero, gawas nga tiguwang na.

Si Poe, gitan-aw nga nagdali nga mahimong presidente. Karon gidudahan na sa iyang pagkamatinud-anon. Matud sa Comelec, namakak si Poe sa pag-angkon diha sa iyang COC pagka-presidente nga niabot na siya sa 10-year residency requirement. Mar Roxas sapoton, init og ulo, nasubrahan sa pagkapolitiko ug walay gitawag nga "x" factor. Miriam Defensor Santiago, maldita, bungangera ug masakiton.

Ug ang labing saba ug lanog nga si Duterte. Maldito ug himalikas. Bisan ang Santo Papa iyang gibalikas. Bukas usab siya nga niangkon sa iyang pagpamabaye ug kaandam nga mopapatay o mopatay sa mga kriminal, durugista, kurakot ug uban pa nga badlongon sa katilingban.

Lima lang sila sa lain pang 125 nga gustong magpapili pagka-presidente kansang tumong mao kuno ang paghatag og tarong nga serbisyo aron mapalambo ug mahatagan sa kahamugaway ang dugay nang nag-antos nga mga Filipino.