Si Poe ug Duterte

Sa boto nga 3-0, gi-disqualify sa Comelec second division ang kandidato sa pagka presidente nga si Senador Grace Poe tungod kay kulang og duha ka buwan ang iyang pagpuyo dinhi sa nasud pag-abot sa eleksyon sunod tuig.

Sigun sa 1987 Constitution, kinahanglan nga nagpuyo og labing menos napulo ka tuig dinhi sa nasud kadtong mga mokandidato sa pagka presidente ug bise presidente sa Pilipinas sa dili pa ang adlaw sa eleksyon.

Apan sigun sa mga dokumento nga gisumiter sa nagreklamo batok ni Senador Poe, nga gidasonan sa Comelec second division, kuwangan pa si Poe og duha ka buwan hinungdan nga siya gi-disqualify sa iyang kandidatora.

Hinuon dili pa final ang disqualification ni Poe kay may remedyo pa siya sa iyang kaso pinaagi sa pag-apelar niini hangtod na sa labing taas nga hukmanan sa nasud.

Samtang laing kandidato ang nag-atubang usab og disqualification mao si Davao City Mayor Rodrigo Duterte kay iyang gi-withdraw ang iyang certificate of candidacy.

Base sa Omnibus Election Code, adunay tulo ka rason nga mahulipan ang kandidato ug mao kining mosunod:

Death o pagkamatay sa kandidato, pag-withdraw sa kandidato sa iyang kandidatora ug disqualification.

Niining tulo, ang pag-withdraw sa kandidato sa iyang kandidatora gikinahanglan nga dili apilon sa kandidato sa pag-withdraw ang iyang certificate of candidacy.

Mao ni karon ang problema sa mayor tungod kay giapil sa pag- withdraw sa iyang gipulihan ang iyang certificate of candidacy.

Kun mao ni, ang mahitabo niini mura’g si kanhi DILG Secretary Mar Roxas na lang ang mahabiling lig-on nga kandidato sa pagka presidente kay gihugonhugonan nga mo-withdraw usab sa iyang kandidatora si Senador Miriam Defensor- Santiago.