Debate sa mga kandidato

Kada estorya ni Mayor Rodrigo Duterte, ulanon og mga pagsaway tungod sa estilo sa iyang inestoryahan nga walay preno. Lakip si Pope Francis niadtong miaging adlaw wala pasayloa sa iyang mga balikas.

Depensa ni Senador Alan Peter Cayetano nga unsaon man ingon ana man gyud ang inestoryahan sa iyang ka-tandem. Bitaw, ang tawo nga aduna nay naandan nga batasan, malisod na gyud usbon. Maliso pay buko sa kawayan.

Pero simbako og ma-presidente, lisud ipaatubang sa mga presidente sa laing nasud. Pananglit iyang balikason si Vladimir Putin sa Russia o si Xi Jinping sa China? Dili kaha siya hipusilan?

Nakasabot hinuon ko nga kining estilo ni Duterte, tipik kini sa branding campaign niya sa iyang grupo. Gisunod ni Duterte ang estilo ni kanhi presidente ug karon Manila Mayor Joseph Estrada nga kaniadto iyang ipaklaro nga walay sulod ang iyang utok.

Gusto ni Duterte nga makuha niya ang masa. Mao kini nga kun manulti siya, mura siya og walay grado. Nagduda ko nga gituyo niya ni.

Hinuon, ang mga tigpaniid sa politika nagkanayon nga maibanan ang mga dumadapig nilang Grace Poe ug Jejomar Binay ning pag-entra ni Duterte.

Sa Philstar.com kagahapon, sila si Kongresista Alfred Vargas sa Quezon City ug Xavier Romualdo sa Camiguin nagkanayon nga dili makan-an ang porsiyentong anaa ni Mar Roxas, kansang base anaa sa mga elite, adunahan, mga trabahante, middle class, ug kadtong gusto nga ipadayon ang programa sa kasamtangang administrasyon.

Ang Mindanao adunay 11 milyones ka botante, mo-solid kaha kini ni Duterte?

* * *

Unsa kaha og atong pa-debatehon silang lima ka presidentiables? Kun mag-atubang si Miriam Defensor-Santiago, Jejomar Binay, Grace Poe, Mar Roxas, ug Digong Duterte, kinsa kaha nila ang makatubag sa mga isyu sa nasud sama sa nagpadayong ka-pordoy sa mga tawo nga minilyon ang walay trabaho, liboan ka mag-uuma ang walay suporta samtang pabaga sa nawong ang mga smuggler, mga ospital ug unibersidad grabe ang pagmahal, ang China wala gyud madala og gulat sa kaso sa international tribunal, nagkainit nga klema, ug uban pa?

Maayo usab gani nga padebatehon ang mga lokal nga kandidato. Kun mag-atubang si Eddie Gullas ug Johnny delos Reyes, sila si Lolypop Ouano-Dizon ug Luigi Quisumbing, silang Mike Rama ug Tomas Osmeña, silang Bebot Abellanosa ug Gerry Carillo, silang Alvin Garcia ug Raul del Mar, silang Paz Radaza ug Jun Pelaez, silang Jonas Cortes ug Dr. Paulus Cañete, silang Winston Garcia ug Junjun Davide, silang Samsam Gullas ug Abe Canoy?

Si Mike likoy makigdebate, si Bebot igo ra segurong mongisi, si Jonas mokitkit sa kuko, si Pelaez panington sa ulo, si JVR mangugat walay klaro, ug si Luigi tingale’g motikig. Si Davide kaha?