Coverage sa mga balikas
Unang naproblema sa mga balikas ni Davao City Mayor Rodrigo Duterte ang ABS-CBN Davao nga maoy nagsibya sa iyang blocktime nga “Gikan sa Masa, Para sa Masa.” Gitawag ang ilang atensiyon sa Kapisanan ng mga Brodkaster ng Pilipinas (KBP) ug sa mga tigtan-aw nga naalarma sa kaabunda sa mga balikas nga iyang giyano-yano paglitok matag sibya.
Ilang sulbad mao ang pag-tape sa programa ug pagsapaw og beep sa tanang balikas inig sibya na. Nasakripisyo ang kaalegre sa live program apan natabonan nang tanang balikas. Samang problema ang nahiagoman sa nasudnong mga sibyaanan sa radyo ug telebisyon nga nag-live coverage sa iyang mga diskurso human nideklarar sa kandidatura pagka presidente.
* * *
Naproblema mi sa DYAB Abante Pa, Bisaya! pila ka buwan ang nilabay atol sa pagsibya sa iyang diskurso atubangan sa mga opisyal ug mga sakop sa KBP Cebu Chapter. Matag balikas ni Duterte, nagdalidali mi og palayo sa among mikropono gikan sa loud speaker. Apan uwahi na kay nadunggan na mang balikas.
Naglisod mi og putol sa live coverage kay undanon ug makalingaw ang pagsubay ni Duterte sa sinugdanan sa kaguliyang sa Mindanao. Gi-am-aman na lang ang among kaugalingon nga pasado alas-10 sa gabii nang nagsugod ang diskurso ug hinaot pa unta nga wa nay mga bata nga nagtikaw-tikaw ug nakapaminaw.
* * *
Dihang nakabalikas na og katulo si Duterte sa proclamation rally sa PDP-Laban sa Taguig, ang teritoryo sa iyang running mate nga si Senador Alan Peter Cayetano, giputol sa ABS-CBN News Channel (ANC) ang ilang live coverage. Nagpadayon pagsibya sa diskurso ang among inahang sibyaanan nga DzMM. Hangtod nga namalikas na sab si Duterte, giputol sa DzMM ang live coverage alang sa ilang major newscast sa alas-4 sa hapon.
Nitakli ang ANC pagsibya sa Vice Presidential Forum sa University of the Philippines (UP) Dilliman nga gitambongan nilang Senador Chiz Escudero ug Kongresista Leni Robredo. Maong wa na madunggi ang pagpalayas ni Duterte ni Pope Francis.
* * *
Kun padayong mamalikas si Duterte nga morang way ugma, mapugos ang media sa paglikay sa live coverage sa iyang mga diskurso ug press conferences. Nga ning panahon sa pinaspasay sa social media dakong kawad-on sa iyang kampanya. Apan kinahanglan bang magpaka aron ingnon si Duterte ug pugson paghimong tradisyonal ang iyang kampanya?
Samtang ang ubang mga politiko nitago sa ilang mga bisyo, si Duterte nibandera sa duha niya ka asawa ug duha ka kabit. Samtang ang ubang piliunon nanumpa pagpatigbabaw sa balaod, si Duterte nisubli-subli pagpasidaan og laktod nga pagpamatay sa iyang gituohang mga kriminal. Samtang ang uban nipasalig pagtahud sa mga institusyon, si Duterte nibalikas sa Santo Papa. Mahibaw-an karong Mayo andam na bang mga botante sa matang sa liderato ni Duterte.
- Latest
