Baruganan gitumban

Wala gyud ko masayop sa akong pangagpas kaniadto nga usa ka dakong drama lang ang pagpadilidili ni Davao City Mayor Rodrigo Duterte sa pagpapili pagka presidente sa umaabot 2016 elections, bisan pa man sa init nga awhag sa iyang mga supporters.

Apan sa kataposan, gidiga na niya ang iyang tinuod nga baraha diha nga gi-withdraw niya ang iyang Certificate of Candidacy pagkamayor sa dakbayan sa Davao ug nagpapili sa labing taas nga katungdanan sa nasud.

Daghan ang nagmaya, apan may nadismaya ‘sab sa katarungan ni Duterte ngano nga napugos siya sa pagpapili pagka presidente sa Pilipinas.

Matud niya nga dili siya makatugot nga adunay mahimong presidente nga usa ka Amerikano nunot sa pagpabor sa Senate Electoral Tribunal kang Senador Grace Poe sa isyu sa citizenship.

Alang kanako mabaw ra kaayo kini nga katarungan nga wala motukma sa gahi ug lig-on nga imahen ni Duterte. Nganong dili na man lang motug-an si Duterte sa tinuod niyang tinguha?

Mas maayo pa gani seguro kun iyang gibarugan ang nahauna nga pamahayag nga kun siya ang ma-presidente sa nasud mobaha gyud ang dugo sa mga kriminal kay sa mogamit siya sa isyu sa kaatbang nga kandidato.

Mas lig-on ug sinsero kun ang serbisyo maoy numero uno nga rason sa pagpapili sa pwesto ilabi na sa Visayas ug Mindanao nga representahan ni Digong.

Samtang wala na lang unta moluwat og pamahayag si Duterte kaniadto nga dili molansar pagka presidente kay iya ra man diay kini nga tonlon pag-abot sa panahon. Nahulog hinoon siya nga walay baruganan kinsa walay kalainan sa iyang mga kaatbang.

Sama ni Mar Roxas nga dali ra kaayo nakausab sa iyang pamahayag. Kaniadto nagtuo si Mar nga usa ka tinuod nga Filipino si Poe hinungdan nga iya kining gipangulitawhan nga mahimong runningmate.

Apan diha nga wala siya sugta ug nakig-atbang pa gyud kaniya, panan-aw ni Roxas kang Poe usa na ka Amerikana. Ang prinsipyo ug baruganan mahimo ra gyud diay tumban aron lang pagkab-ot sa politikal ug personal nga katuyoan.