Mananambal nga si doktor

Ang tema nato karon, dili kini mahitungod sa pekeng doktor o nagpakaaron- ingnon nga doktor sa iyang pagpanambal. Ang atong tukion karon, mao ang mga mananambal nga may kapasidad usab sama sa gihimo sa usa ka doktor. Apan sa laing bahin, dili sab tanang doktor, mga mananambal sa ilang propesyon.

Sagad o komon nga atong nasayran, basta doktor ang ilang propesyon o trabaho mao ang pag-ayo o pagtambal sa mga sakit sa lawas. Ang pagka-doktor, aduna kini lainlaing nga kategoriya. Tungod kay dili tanan nga doktor, nagpraktis sa pagpanambal. Ang pag-eskuyla og doktor, mao ni ang kinatas-ang rekisitos sa pagtuon sa usa ka kurso, nga dili lang mahitungod sa pagpanambal.

Kadaghanan sa mga doktor makita sa ospital, mga mananambal kana sa medisina (Doctor of Medicine), moresita nga ayuhon ang sakit. Apan kun di na mabuhi, aw pari (Doctor of Divinity) na say sangpiton. Ang pasyente o himatyon na, usa diay ka batid nga magtutudlo (Doctor of Education). Sa korte sab, maglantugi kinsay husto nga pulos abogado (Doctor of Laws). Unya naa sab ang batid sa pag-ayo sa makina (Doktor of Engine) ug daghan pang klase sa doktor.

Sa giingon na nato, duna say mananambal nga dili doktor. Hinuon, managsama sila'g trabaho nga ang tumong mao ang pag-ayo sa lawas. Apan managlahi ang pamaagi. Adunay mananambal nga wala tawga'g doktor, yano lang sila gitawag og mga 'therapist', 'herbalist', 'nutritionist', 'naturotherapist', 'tambalan', 'spiritual healer'. Pagpanambal kini dili sa sakit, kundili ang pag-ayo sa hinungdan sa pagkasakit, nga pahimsogon ang lawas nga mawala ang sakit.

Sagad ani nila, natural/alternative healing ang gigamit, sama sa mga pagkaon (prutas, utanon, lamas, uban pa), gamut, dahon, panit sa kahoy ug uban pa. Duna say reflexology, guasha, acupuncture, auriculo, ug uban pa.