Partner ang media bolatik ra!

Pagkamaayo nga moabi-abi nga daw espesyal kaayo nga bisita ang mga sakop sa media kong magpatawag og press conference ang mga ahensiya o buhatan sa gobiyerno. Sugaton ang mga tigbalita sa tam-is kaayo nga pahiyom sa ilang mga opisyal. Apan kung ang media na gani ang nanginahanglan nga mokuha sa ilang pamahayag kalabot sa mga kontrobersyal nga isyu nga gilambigitan mahimo na man nga tagolilong o invisible ang mga opisyal nga dili na makit-an, kung tawagan sa cellphone dili na motubag ug mas grabe pa kong ma-corner ang opisyal bastos na man kaayo nga dili na makaila sa mga tigbalita ug dali kaayo makasibat.

Adlaw nga Miyerkules nag-follow up ko sa pagpuga sa tulo ka mga binilanggo sa Carcar City Jail diin gisabligan matud pa sa mga binilanggo og tubig nga gipos-an og sili ang mata sa jail guard ug dayon dasmag hinungdan nga nakaeskapo.

Wala  gyud tawon moatubang ang ilang warden aron unta makahatag man lang og katin-awan. Ang nakaparat pa kay gidid-an kami sa hanggaw nga jail guard pagkuha og video footage bisan man lang sa facade o atubangang bahin sa jail facility kay mao kuno ang mando sa BJMP. Wala sila malipong? Kanus-a ra man bawal kuhaan og litrato o video ang usa ka pampubliko nga edipisyo?

Labon niadtong pipila ka buwan ang nakalabay atol sa pagbalhin sa mga binilanggo sa bag-o nga Carcar City Jail sila ang nanawag alang sa media coverage. Dili na lang nila itago ang ilang palpak ug angayan gani makigtambayayong sa media kay basin og makatabang sa dali nga pagkasikop sa mga pugante pinaagi sa pagpakita sa mga hulagway niini sa telebisyon ug sa pamantalaan.

Samtang wala’y kalainan niini ang Vicente Sotto Memorial Medical Center diin nakorner unta sa media ang ilang opisyal apan nagpalingoglingog lang sa isyu sa palpak nga caesarean section diin nabuslot ang pantog sa pasyente. Idugang pud ang DPWH nga nagpahuwat og kapin sa usa ka oras alang sa gipatawag nila nga media coverage apan wala magpa-interview ang gisangonan nga moatubang sa media ug kalit nga mibiya sakay sa iyang service vehicle.

Pagkawalay batasan!

Tinood ang media partner nila kong sila ang nagkinahanglan.