Bangga sa SET

Unsaon kaha sa pagdepensa sa mga politikong sakop sa Senate Electoral Tribunal ang ilang kaugalingon karon nga mitingog na ang mga kauban nila nga pulos sakop sa Korte Suprema? Silang Associate Justice Antonio Carpio, tsirman sa SET, ug Associate Justices Arturo Brion ug Teresita Leonardo-De Castro, uban kang Senador Nancy Binay, mibotar sa pag-disqualify kang Grace Poe sa Senado tungod kay dili kini natural-born citizen.

Si Brion nagkanayon nga dili mahimong makapangangkon si Grace nga natural-born citizen siya kay wala man ma-establisar iyang mga ginikanan. Bitaw, pananglit mga langyaw iyang mga ginikanan?

Bisan pa og Pilipino si Grace, apan ang iyang pagkuha og American citizenship sa dihang nagkagubot ang Pilipinas atol sa Martial Law misamot nga nakapaduda sa iyang pagka-natural born citizen.

Tungod sa desisyon sa SET, Si Mayor Digong Duterte nahagit pinaagi sa pagpangutana kun gusto ba sa mga Pilipino nga adunay Amerkana nga presidente. Mao kini hinungdan nga iyang gideklarar sa hingpit iyang kagustohang modagan pagka-presidente sa 2016 nga eleksiyon.

Si Mar Roxas, ang standard bearer sa administration party nga Liberal, mitingog sa balita nga gusto ni Duterte nga mo-substitute. Matud ni Roxas nga wala siya mahadlok kun mohinayon og dagan si Digong.

* * *

Kagahapon, gitawgan ko sa akong higala nga natanggong sa trapiko sa Mandaue samtang nagpaingon sa Mactan Cebu International Airport aron mosakay sa sayong buntag nga flight paingong Manila. Wala gyud koy laing tubag niya gawas sa pag-ingon nga basola ang siyam ka tuig nga pagka-mayor ni Jonas Cortes.

Kining mga karsada sa Mandaue maoy EDSA dinhi sa Metro Cebu. Ang nakanindot lang kay moaksyon ang mga opisyal sa Manila, ilabi na ang MMDA, si Jonas wala gyuy nahimong sulbad niining huot nga trapiko sa maong siyudad.

Si Konsehal Lolypop Ouano-Dizon miduso og pagtuon sa trapiko sa Mandaue. Apan akong nadunggan nga gibabagan kini sa kampo ni Jonas. Siyempre, dili gyud suportahan ni Jonas ang gidusong sulbad ni Lolypop kay basin og mosamot kini og kahumot sa mga tawo.

Ang trapiko mao usab ang gihimong isyu nga gibalikbalik sa kaatbang ni Jonas nga si Dr. Paulus Cañete. Ang nakaparat ra ba kay si Jonas dili gyud mosukol og inatubangay nga debate ni Paulus.

Kun sa edukasyon hinuon, doctorate ang naabtan ni Paulus gawas sa iyang mga kurso sa kolehiyo, samtang si Jonas gradwado sa Bachelor of Science in Animal Science. Ang akong technician sa akong baboyan mura’g gradwado kadto siya sa animal science mao nga kun estoryahan nako og politika ug panggobiyerno monganga ra gyud intawon.

Puera sa edukasyon, ang siyam ka tuig sa pangagamhanan igo na kaayo nga makakat-on unsaon pagsulbad sa trapiko, pero wala gyud kini mabuhat diha sa Mandaue.