Kalandrakas

Gipahibalo ni Senador Allan Peter Cayetano nga modagan gayod si Davao City Mayor Rodrigo Duterte sa pagka presidente ug siya ang bise presidente. Kun ugaling tinuod kining gisulti sa senador wa gyud ko masayop sa akong pangagpas nga usa lamang ka pamaagi sa pagpangampanya ang pagpagahi-gahi ni Duterte sa pagdagan sa pagka presidente. Sa laktod, nagpaprisyo ug aron ingnon nga napugos siya pagdagan tungod sa kagustohan sa katawhan, NGEE.

* * *

Malampuson nga natapos ang APEC SUMMIT nga gipahigayon sa kaulohan. Sa maong kalampusan angayan nga pasalamatan ang mga babaying igsuon ni presidente Noynoy Aquino nga maoy nag-atiman sa mga asawa sa mga delegado ug sa mga delegado mismo sa APEC. Ang mga babaying igsuon sa presidente maoy mihulip sa trabaho unta sa asawa sa presidente. Ngano ba pud nga hangtod karon wa pa man makahunahuna og pangasawa ang presidente. Dili seguro siya gusto og steady, tilawtilaw ra seguro iya gusto.

* * *

Hangtod karon wa gihapon masulbad sa kapolisan sa dakbayan sa Sugbo ang suliran sa illegal numbers game nga SUWERTRES. Ambot og unsay gihimo sa kapolisan sa dakbayan ug lalawigan sa Sugbo niining maong suliran nga nakaadik sa katawhan nga nangiyawat. Seryoso ba ang kapolisan sa pagsulbad sa suliran o compliance lamang aron ingnon nga adunay gihimo pero sa tinuod gihiktan ang ilang liog sa mga operators. Ang illegal nga SUWERTRES dili basta-basta nga negosyo gani nag-away na niini ang duha ka konsehal sa dakbayan sa Talisay kay nagkompetensiyahay.

* * *

Masupakon sa balaud ang pipila ka mga tawo sa kaulohan. Dili sila gusto nga mosunod sa lagda sa trapiko.

Mao ni ang suliran sa mga Metro Manila Development Authority enforcers kay pamusilon sila ug kulatahon sa mga tawo nga ilang badlungon. Ang kanhi chairman sa MMDA nga si Atty. Francis Tolentino nga mikandidato sa pagka Senador nanawagan karon sa gobiyerno nga hatagan og protection ang mga enforcers nga giabuso sa ilang pagpatuman sa lagda sa trapiko.