EDITORYAL – Buko sa kawayan

Adunay panultihon nga nagkanayon – ang tawo ra nga buang maoy dili maantigo nga mousab sa iyang hunahuna.

Tingali mao kini ang gamitong rason ni Davao City Mayor Rodrigo Duterte nga mihukom na nga magpapili siya pagka presidente sa Pilipinas.

Sa makadaghan nga higayon nagsige og balibad si Duterte ug misaad nga dili gayud siya magpapili sa labing taas nga katungdanan sa nasud.

Gibutyag ni Duterte sa usa ka interview kaniadto nga kausa ra siya mopakanaog sa iyang hukom ug kini giluwatan na niya nga dili siya modagan pagka presidente.

Diha nga giingnan nga may higayon pa siya hangtod sa Disyembre 10 aron mo-substitute sa gipadagan nga kandidato sa Laban ng Demokratikong Pilipino (LPD), matud ni Duterte nga ang iyang pagkatawo dili usa ka pang-substitute.

Tungod niini, misamot nga ang mga tawo nga mi-idolo ni Duterte midayeg pag-ayo kaniya tungod sa iyang baruganan nga kun makahimo na og hukom, kini na gayud ang iyang barugan.

Dili mabasol ni Duterte nga daghan unya sa mga tawo nga kaniadto midayeg ug misuporta kaniya, apan karon moyamiid na tungod sa pag-usab-usab niya sa iyang hukom.

Mas nindot nga ang tawo nga angayang himoon nga presidente mao kadtong adunay baruganan nga susama sa buko sa kawayan.

Dili ba aduna may panultihon sa kakaraanan nga “Maliso pa ang buko sa kawayan?”

Dili imposible nga kun si Duterte mahimong presidente sa nasud madala ra siya sa lingla sa ubang adunay personal interest aron nga dapigan ang ilang katuyoan.