Halapad nga karsada sa Negros Occidental

Sa duha ka adlaw nakong bakasyon sa Bacolod, daghan ko og obserbasyon nga ikakumparar sa Sugbo ug Negros Occidental.

Alang sa wala pa makaadto sa Bacolod agi sa San Carlos City makuratan gyud ka nga magtan-aw sa kalapad sa Don Salvador Benedicto highway. Kini nga highway naglagbas sa San Carlos City paingon sa Murcia lahos na sa Bacolod, tag tinagutlo ka lane, ikumparar sa atong mga highway sa Sugbo. Ang atong gipanghambog nga Cebu South Coastal Highway lapad man tuod sa South Road Properties apan pag-abot sa Talisay area, tagduha na lang ka lane, parkingan pa og mga sakyanan sa kilid, gipadaganan pa og mga traysikol, misamot kagamay.

Ang Negros Occidental adunay lapad kaayo nga mga highway apan mingaw ug wala kaayo’y mga sakyanan. Ang Cebu gagmay kaayo og karsada pero daghan kaayo og sakyanan.

Ngano kaha kini?

* * *

Nagbangi ang baruganan nilang Mayor Jonas Cortes ug Dr. Paulus Cañete kabahin sa tinguha nga lone district. Si Cortes ganahan kaayo nga ma-lone district ang Mandaue, samtang si Cañete miduso og Mandaue del Norte District nga sakopan sa mga barangay sa Mandaue nga anaa sa amihanang bahin, ug lungsod sa Consolacion, ug Mandaue del Sur District nga sakopan sa mga barangay sa Mandaue sa habagatang  bahin ug lungsod sa Cordova.

Apan dili ba kaha masuko ang mga botante sa Consolacion ug sa Cordova niining tinguha ni Cortes? Si Cortes nanguyab karon sa mga botos sa mga taga-Cordova ug Consolacion apan sa ngadto-ngadto i-abandonar ra diay niya kining duha ka lungsod. Kun i-lone district ni Jonas ang Mandaue, ma-abandonar ang Consolacion ug Cordova. Modawat ba kaha ang kinto distrito sa Consolacion? Ang siyudad sa Sugbo o siyudad sa Lapu-Lapu modawat ba kaha sa Cordova?

Ang maayo niini, debatehan nilang duha ni Jonas ug Paulus kining isyu sa distrito sa siksto. Mosukol ba kaha si Jonas?

Mao kini wala hunahunaa ni Jonas. Moduso siya og butang nga makapikas-pikas sa siksto distrito. Hinuon, wala man gani siya makahunahuna pag-ayo sa mga puso nga kahakotan og tubig sa mga residente sa Mandaue, unsa na kaha kanang redistricting?

Dugay na kaayong nanghangyo ang mga residente sa barangay Centro ug Guizo nga kahimoan sila og puso, apan wala gyud sila tagda ni Jonas.

Miduol kang Konsehal Lolypop Ouano-Dizon ang mga lumolupyo sa Centro ug Guizo aron kahimoan sila og puso kay matud nila bahala na og walay kuryente basta may tubig lang sila. Wala may pundo ang Mandaue City Hall, mikuot sa kaugalingong bulsa si Lolypop aron kahatagan og puso ang mga tawo sa maong duha ka barangay.