Tulisok sa CICC

Mibunga na gayud ang pagpabaya sa kagamhanan sa lalawigan sa Sugbo sa Cebu International Convention Center sa dihang ang kanhi gobernador ug usa ka abogado ang mikiha kang Gobernador Hilario0 Davide III ug mga sakop sa Provincial Board.

Si kanhi gobernador ug karon Kongresista Gwen Garcia ang misang-at og criminal complaint batok kang Davide sa Office of the Ombudsman-Visayas tungod kuno sa pagkawalay aksiyon sa kasamtangang gobernador sa estado karon sa CICC.

Sa iyang reklamo, matud ni Garcia nga nakalapas si Davide sa balaud tungod sa pagpasagad niini nga madugta ang CICC human kini naguba sa kusog nga linog ug dakong bagyo nga mihapak sa Sugbo kaniadtong 2013.

Ang maong reklamo gipasaka ni Garcia usa ka adlaw human nga mipasaka og kaso ang usa ka residente sa dakbayan sa Mandaue batok sa kagamhanan sa lalawigan kabahin usab sa nagyaka nga edepisyo.       

Midangop sa Ombudsman si lawyer Ervin Estandarte aron pagpasaka og kaso batok sa mga opisyales sa Kapitolyo. Siya mialegar nga dakong salapi sa katawhan ang nasayang sa pagpabaya ning maong mga opisyal sa CICC.

Tungod kay atua na sa anti-graft office ang maong mga reklamo, ato na lamang nga paaboton ang resulta. Ug hinaut nga dalion kini sa Ombudsman paghusay aron mahibaw-an sa publiko kun unsa gayud ang tinuod nga status sa CICC. Daghan ang pangutana ug opinyon ang mitumaw. Angay ba gayud nga pasagdan ang nagkagusbat na nga convention center taliwala sa kasong gipasaka batok sa kanhi namunoan sa probinsiya gumikan sa kontrobersiya sa katukoran niini?

Hinuon alang kang Davide, dili gayud angay nga hilabtan ang maong edipisyo tungod kuno sa legal nga isyu. Gani nagdumili siya pagsanong sa mga panawagan pag-renovate niini aron lagi nga mapahimuslan sa lalawigan.

Apan insakto kaha kini nga rason sa maong gobernador? Angay bang pasagdahan na lamang sa Kapitolyo ang padayong pagpiyesta sa mga anay sa CICC tungod lagi kay kamulo pa man ang kaso sa katukoran niini batok sa nangaging pamunoan?

Sa akong tan-aw, adunay responsibilidad ang kasamtangang kagamhanan sa probinsiya pagmintenar sa maong convention center. Mas maayong dili na lamang manghinaw si Davide ug iya kining bangonon aron nga kapahimuslan sa mga Sugboanon. 

Kay kun pabilin kining maong building nga nagyaka, basin unya nga ang tulisok sa corruption kabahin sa katukoran niini, adto na hinuon mapunting kaniya.