Inutil sa trapiko
Nangandoy ang mga motorista ug mga pasahero nga matanggong matag adlaw sa Minglanilla sa habagatang Sugbo nga makaamgo ang lokal nga mga opisyal nga makatabang pagpaluag og diyutay sa trapiko kun sabuton ang mga traysikol ug mga habal-habal nga di lang una manabok sa nasudnong highway samtang nagpadayon pa ang pag-ayo sa dan.
Samtang nangayo og pasaylo ang lokal nga mga opisyal sa tanang nahasol sa trapiko, wa silay tinguha pagtuman sa ilang pangandoy. Di sila mangahas pag-apiki sa mga biyahe sa mga traysikol ug mga habal-habal. Kansang mga drayber ug mga pasahero pulos mga botante sa Minglanilla. Di nila mga botante ang mga motorista ug mga pasahero nga igo lang mangagi.
* * *
Di monopoliya sa Minglanilla ang kahiktin sa panglantaw. Mao say gihimo sa ubang mga lungsod ug mga dakbayan. Gimandoan ang ilang traffic enforcers pagpalabi sa mga molupyo, nga hinaot rehistradong mga botante nga makatabang nila sa piniliay, kay sa mga lumalabay lang.
Mas pating lang gyud hinuon ang mga tagduma sa trapiko sa Minglanilla. Gihimo nila ang nasudnong highway nga parkinganan di lang sa mga traysikol ug mga habal-habal kun dili hasta na sa mga taxi ug pribadong mga sakyanan nga may mga transaksiyon sa mga bay patigayon sa palibot. Maong barado nang daan ang trapiko bisan way trabaho sa highway.
* * *
Maong pakyas ang kampanya sa Department of Public Works and Highways (DPWH) paghawan sa nasudnong kadalanan sa Metro Cebu. Kay igo lang silang giyangu-yango sa lokal nga mga opisyal. Pagtalikod nila balik ra sab ang mga nakababag sa highways. Kay, nakatag-an ka, pulos mga botante ang mga ilegal nga nagnegosyo ug niparada sa nasudnong kadalanan.
Mas salbahis gyod hinuong lokal nga mga opisyal sa Minglanilla. Gisuklan gyod nilang mga inspektor sa DPWH nga nisuway paghawan sa nasudnong highway. Ug kay mga inhinyero man ang hawod sa DPWH, way nahitabo sa rekomendasyon sa ilang mga abogado pagpasaka og tukmang mga kaso.
* * *
Kun inutil ang DPWH, kinsa man ang laing nasudnong ahensiya nga makabadlong sa lokal nga mga opisyal nga magpataka lang og patuman og mga lagda nga makagubot sa nasudnong highways kay ang panglantaw kutob ra sa tumoy sa ilang ilong, bahala na kun pila ka oras nga matanggong ang lumalabay nga mga motorista ug mga pasahero?
Kutob na ba lang sa pagluom ang mga natanggong sa trapiko? Kay ang mga tagduma nagpadayon sa pagpatuman sa samang mga lagda nga nakapasamot hinuon sa kahuot sa trapiko. May mas bangis pa ba kay sa panghunahuna nga mahimong ipadayon ang pagpukpok og martilyo sa ulo sa katawhan, nga angay unta nilang panalipdan, uban ang panghinaot nga moabot rang adlaw nga lahi nang resulta? O maanad ra sila?
* * *
- Latest
