Nagkainit na, nagkauga pa
Labihang pamaypay sa tanang nanambong sa among tigom sa ABS-CBN Broadcast Complex sa Jagobiao, Mandaue City gahapon sa hapon. Kini bisan nag-andar ang among aircon nga among giabagan og electric fans. Hapit na gyod namo ipasusi wa ba madaot ang among airconditioning units dihang niabot ang text message ni PAGASA Visayas Director Oscar Tabada nga nagpahibawo nga narehistro nila ang labing taas nga temperatura.
Niabot og 32.9 degrees Celsius ang kainit nga nasukod sa PAGASA Cebu Weather Station sa ala-1:50 gahapon sa hapon. Gawas nga mao ni ang labing taas nga temperatura karong buwana, mao pa gyud ni ang labing taas nga temperatura sa Nobiyembre sa niaging duha na ka dekada.
* * *
Napapas ang kinatas-an unta nga temperatura karong buwana nga 32.6 degress Celsius sa niaging adlawa. Nipasabot si Tabada nga ang kataposang mas taas nga temperatura narehistro sa Kalag-Kalag 22 ka tuig ang nilabay (Nobiyembre 1, 1993) nga niabot og 33.8 degrees Celsius.
Nipasidaan siya nga padayong mosaka ang temperatura sa umaabot nga mga adlaw. Nga mahimo ganing mokapin sa 33 degrees Celsius sa di pa matapos kining tuiga. Ang orihinal nga banabana nga sa Enero sa bag-ong tuiga mabatyagan ang labing bangis nga epekto sa El Niño giusab sa mga eksperto. Mahimong mas sayong moabot sunod buwan.
* * *
Kun mahinayon ang gikabalak-an nga kinakusgan nga huwaw karong Disyembre, mahimong mas sayo sab nga mahuman sunod tuig. Inay sa orihinal nga banabana nga maabtan ang El Niño sa Mayo 2016, mahimong magsugod na og tidlom sa Enero ug Pebrero ug hingpit nang mokagiw sa Marso.
Sa akong pagsuwat ini, nipahibawo ang PAGASA nga nag-uwan sa pipila ka bahin sa habagatang Sugbo (Argao, Carcar City ug San Fernando) ug Bohol (Tagbilaran City, Dauis, Calape ug Antequera). Apan matod ni Tabada nagkuwang na pag-ayo ang uwan sa Sugbo ug Kabisay-an nga peligrong maapiki na sab, sama sa niaging summer karong tuiga, ang daginuton nang daan natong suplay sa tubig.
* * *
Ang pat-ak-pat-ak, kalit-kalit ug dasmag-dasmag nga uwan gikan sa Nobiyembre 1 ngadto sa 18 karong tuiga nasukod sa PAGASA Cebu Weather Station nga nikabat lang og 8.6 mm. Nga labihang ubosa (5% ra) kun itandi sa average nga uwan sa Nobiyembre nga 158.4 mm.
Nitambag si Tabada nga bisan wa pa hingpit nga mapawong ang mga gripo sa kabalayan angay’ng magdaginot nang mga konsumidor sa tubig. Subli sang nipasidaan ang Department of Health (DOH) sa mga bata ug bisan sa mga dagko batok sa dehydration ug heat stroke pinaagi sa paglikay sa direkta nga pagpatandang sa kainit sa adlaw, pagbawon og binotelyang tubig ug kawo, payong ug uban pang mga pandong.
- Latest
