Pag-usik sa salapi

Mangutang og P400 milyones ang kagamhanan ni Mayor Jonas Cortes aron ipatukod og bag-ong merkado sa dakbayan sa Mandaue.

Kining maong laraw ni Mayor Cortes pag-usik-usik lang sa salapi sa katawhan sa dakbayan sa Mandaue.

Ngano nga magtukod man og laing merkado ang mayor nga unta aduna na may merkado nga nagbarog nga wala pa mahuman?

Ngano nga dili man lang kana ang humanon? Gikinahanglan ba gud ang pagtukod og bag-ong merkado ug pasagdan na lang ang wala pa mahuman tungod kay dili siya ang nagsugod niini?

Tumong ba sa laraw sa mayor ang pagtukod gyud og merkado o ang pagtigom lang og salapi para ipundo sa umaabot nga eleksyon? Wala ko mamasangil, nangutana lang.

Sa akong pag-inusara samtang nagbasa sa pamantalaan, nakapangutana ko sa akong kaugalingon kun wala ba maanugni ang mga opisyal sa Mandaue sa salapi nga gipatukod sa merkado nga wala pa mahuman ug gipasagdan lang?

Wala na ba gyud sila’y laraw nga mapahimuslan pa ang salapi nga gisugod sa pagpatukod niini?

Kun magtukod man og bag-ong merkado si Mayor Cortes, nganong mangutang man og P400 milyones? Ngano nga dili naman lang siya mosunod sa iyang presidente nga si Noynoy nga nagduso sa Public Private Partnership?

Niini, wala’y salapi nga mogawas sa panudlanan sa dakbayan sa Mandaue tungod kay ang pribadong sector man ang mogasto sa merkado.

Sigun sa akong nadunggan, ang San Miguel Corporation migahin og P8 bilyones para sa Public Private Partnership. Ngano nga dili man niya kini pahimuslan?

Porbida. Kining uban nga opisyal ang ila na lang gyud nga kaugalingon nga interest ang unahon. Unaha pud kuno ninyo ang interest sa katawhan.