EDITORYAL – Palpak sa LTO

Nakahimo na usab og dakong palpak ang kadagkoan sa Land Transportation Office (LTO) kay mikuha sila og kontraktor sa paghimo og plaka sa mga sakyanan apan dili takus nga mohatag sa gikinahanglan.

Ang kadagkoan sa LTO nga gipangulohan ni Alfonso Tan Jr. nakahukom nga parehason na ang tanang plate numbers sa mga sakyanan, bag-o man o daan.

Sa mga daan nga sakyanan, mao ra gihapon ang plate numbers apan susama na ang desinyo sa bag-o nga plaka, kanang puti ang background unya itom ang litra.

Ang tanang mga tag-iya og sakyanan nga mopa-renew sa ilang rehestro pabayron og dugang P450 isip bayad sa bag-o nga plate numbers ubos sa saad nga mahatag ang bag-ong plaka sulod sa 45 ka adlaw.

Apan kadtong mga nagpa-renew sa rehestro sa ilang sakyanan kaniadtong Pebrero, sa ato pa ang nag-ending og (2) sa ilang plate numbers wala pa gani maabti sa ilang bag-ong plaka.

Sa ato pa, kaliboan ka plate numbers nga nag-ending og 2, 3, 4, 5, 6, 7, ug 8 ang wa pa nila kahatagi sa bag-ong plaka. Lain kining palpak sa pagdumala ni Tan sa LTO.

Dili makabasol ang mga tinugyanan sa LTO nga daghang sakyanan ang nagdagandagan karon nga walay mga plaka ug gikalipay lang usab sa mga sakop sa LTO kay makarason man sila nga dili mohimo og operation kay malooy sa mga motorista nga walay sala.

Ang mga regional directors sa LTO kinahanglang mopadangat niining mao nga sentimento sa katawhan didto sa ilang mga opisyal sa kaulohan, dili kay magkyugpos lang sila nga walay gihimo sa maong problema.