Pagpangatake sa Paris

Biyernes 13!

Giatake sa mga sakop sa Islamic State kon IS ang unom ka lugar sa Paris, France.

Human sa pagpangatake, 127 ang gikompirmar nga nangamatay. Posible pa nga mosaka ang maong gidaghanon tungod sa kadaghan sa mga tawo nga nangasamdan ug anaa pa sa kritikal nga kondisyon.

Nasubo ug naalarma ang kalibutanong komunidad sa laing bangis ug linuog nga pagpangatake nga binuhatan sa mga sakop sa IS.

Sa usa ka video nga gipagawas sa Islamic State sa wala pa nahitabo ang pagpangatake, gipadayag sa usa ka militante nga dili magmalinawon ang Fransya tungod sa ilang pagpanginlabot ug pag-apil sa mga pagpangatake nga gipasiugdahan sa Amerika batok sa ilang kaubanan.

Gawas sa Fransya, nahulga usab ang kalinaw ug kinabuhi sa mga molupyo sa ubang kanasuran nga nakig-alayon sa Amerika sa agresibo nga paggukod sa mga teroristang IS. Nideklarar na og national state of emergency si Presidente Francois Hollande sa Fransya nga nihulagway sa pagpangatake nga usa ka "act of war" o pagpakiggubat sa IS batok nila.

Kini ang ikaduha nga higayon nga nideklarar og national state of emergency ang Fransya human sa ikaduhang gubat sa kalibutan. Unom ka dapit sa Paris ang dungan nga giatake sa mga sakop sa IS.

Usa niini mao ang gawas nga bahin sa Stade de France national stadium diin didto sa sulod si Presidente Hollande kauban ang German foreign minister nga nitan-aw sa friendly soccer match tali sa Fransya ug Germany.

Gipahugtan ang seguridad sa tibuok Fransya nunot sa pagdeklarar og tulo ka adlaw nga pagbangutan human sa dugoon ug bangis nga pagpangatake.

Ang Eiffel Tower nga dagsaon sa kaliboan ka turista matag adlaw, gipasirad-an una.

Ang ubang kanasuran nikondenar na usab sa bangis nga pagpangatake sa IS batok sa Fransya. Si Presidente Barack Obama sa Amerika nisaad og hinabang ug hingpit nga suporta alang sa Fransya.

Si President Aquino sa iyang bahin nitigum dayon sa iyang Cabinet security aron maplantsa ang mas hugot nga seguridad, ilabi na sa panagtigom sa Asia Pacific Economic Cooperation leaders sulod ning semanaha didto sa kaulohan.

Nianam kasibaw ang pangalan nga IS tungod sa bangis nga pagpamatay sa mga mosupak sa pagpatunhay sa alang nila estado o pamunoan nga pinasubay sa Islamic law kon Sharia.

Tinguha sa IS nga ang tanang Muslim sa tibuok kalibutan moyukbo, motahod ug mounong ngadto sa ilang leader nga si Ibrahim Awad Ibrahim al-Badri al-Samarrai nga mas naila nga si Abu Bakr al-Baghdadi. Ila usab nga gimandoan ang ubang grupo sa mga Jihadist sa tibuok kalibutan sa paghangop ug pagdawat sa ilang liderato.

Butang nga gikondenar sa Muslim community nga nipatugbaw sa malinawon nga panimuyo.

Kini ang usa ka pait nga kamatuoran sa kaalaotan sa mga inosenteng sibilyan nga masakripisyo tungod sa lubag nga panghunahuna sa pipila ka tawo nga nabuta sa gahum.