Godless America?

Giingon dinhi nga miabot na og 63% ka mga Amerikanhon ang wala na motuo nga dunay Ginoo. Earlier dunay mga sugyot nga wagtangon, papason ang napatik sa ilang mga kwarta, ang In God We Trust.

Sa ato pa, muabot ang panahon nga ma-Godless na unya ang America. Itandi sa uban nga advanced countries, mas daghan kaayo ang mga Amerikanhon nga wala na motuo og Ginoo. Matud pa, samtang mao usab kini ang nahitabo sa ubang kanasuran, apan dili kaayo sama ka daghan sa America.

Lagmit, alang sa mga Amerikanhon, lisud kaayo ang pagtoo sa Ginoo, tungod kay daghan kaayong mga restrictions, sama sa gikasuk-an sa mga Hudeyo sa mga gipangdili nga gi-imposed ngadto kanila ni Jesukristo.

Maayo nang walay Ginoo-Ginoo kay makapatuyang sila sa ilang gusto. Walay magdili kanila sa buot nilang buhaton. So, hayahay kaayo.

Ang akong nahadlokan nga tungod kay atong idolo ang mga Amerikanhon, mosunod ug muawat usab kita kanila niining bag-o nilang gisagop nga belief ug assumption.

Ato lang na silang pasagdan. Ila sad ning mga katungod. Apan, tungod kay daghan nang mga Amerikanhon ang wala na motuo nga dunay Ginoo, wala kini magpasabot nga wala na gyuy Ginoo.

Ikaw, 'sa man, mag-Godless Philippines sad ta? Dunay usa ka scientist ang miingon nga it is easier to prove that there is God, than to prove that there is none.

* * *

Niay maayo alang sa mga coco farmers. Napasar na ang HB 6137 nga mag-establish sa Coconut Farmers and Industry Development (CFID), nga makapahimulos na ang mga coco farmers sa coco levy funds.

Unsa man ning coco levy funds? Mao kini ang buhis gikobra gikan sa mga coco farmers, gibut-an sa Presidential Decree 755 sa tuig 1975. Ang tuyo niini, mao unta nga makapahimulos ug maka-benepisyo ang mga nag-uma sa lubi gikan sa nakobra nga buhis, apan, matud pa, "were instead used to buy large percentage of the bank now known as United Coconut Planters Bank under Eduardo "Danding" Cojuangco,"  ang pangulo karon sa NPC, ang partido nga gisaligan  ni Sen. Grace Poe.

Subay niini, tukoron ang Trust Fund alang sa mga coco farmers ug sa ilang banay, ang  Social Development Fund, Marketing Fund, Farmers' Cooperative, ug Small & Medium Scale Coconut Enterprises.

Gibana-bana nga as of 2013, ang coco levy funds mikabat na og P200 bilyones apan  wala kapahimusli sa mga mag-uuma.

Author ning maong balaudnon, si Party-list Representative Sharon Garin.