EDITORYAL - Mga bakak diha sa social media

Adunay nikatap sa social media nga comical skit sa usa ka Japanese show nga diin nagpakita kun giunsa paghimo ang matud pa modus operandi sa "tanim bala" diha sa Ninoy Aquino International Airport (NAIA).  Ang mga aktor ug aktres nagsuot og uniporme sa mga kawani sa airport ug aduna pa silay props nga kunohay x-ray machine tunnel ug kataw-anan kaayo ang pagkahimo.

Gipakita didto ang usa ka bagahe nga gipaubos sa x-ray, ug kalit lang adunay pormang bala nga nakita diha sa screen kauban sa mga sud sa bagahe.

Dihadiha gipugngan ang "pasahero" apan ang x-ray screener mikangkang dayon sa iyang palad nga daw nangayo og kwarta ngadto sa pasahero.

Nakatawa ang mga audience, apan kun sabton ang mensahe nga ilang buot ipaabot sa mga nagtan-aw, usa kadto ka pahimangno bahin sa pagpangilkil nga nahitabo sa NAIA dinhi sa Pilipinas.

Ang Japan ikaupat sa kinadaghanan og turista nga magduawan dinhi sa Pilipinas, nag-una ang South Korea, gisundan sa Amerika ug China. Sumala pa sa record sa www.tourism.gov.ph. ang Japanese tourists nakapasud na og P1.44 bilyon dinhi sa Pilipinas karong tuiga.

Itandi sa tuig 2014, 21.58 percent ang pagsaka sa kwartang  gigasto sa mga turista dinhi sa nasud niining tuiga sa wala pa ang kontrobersiya sa "tanim bala." Apan hayan nga mous-os kini sa pagtak-op sa tuig.  Dili mabasol ang producer sa maong Japanese show kay ilaha kadtong paagi pagtabang aron di mabiktima ilang katagi-lungsod ug klaro sa eksena ang ilang mensahe.

Apan dinhi sa Pilipinas, nagpasad sa social networking sites ang mga bakak nga mga balita o "memes" bahin niini nga ang tumong pangintriga ug pagpangdaot lamang batok sa mga gikalagotan nilang tawo. Ang ingon niini nga mga balita di makatabang sa Pilipinas aron moasenso.

Angay unta magmatngon ang mga netizens ug gamiton nila ang social medial aron  ipabati ang ilang pagmahal sa nasud inay personal nga interes.