Mibahag ang ikog?

Gisukod na gayud sa Estados Unidos ang military might sa China sa dihang gipalawig niini ang usa ka barko nga iggugubat sulod sa 12 nautical miles gikan sa usa sa mga isla nga gi-occupy sa China diha sa South China Sea.

Wala ka ugpo ang China pag-agi sa US Navy guided-missile destroyer. Kini bisan pa man sa sigeng sing-al sa higante’ng nasud sa Asya nga nag-warning sa mga barko sa ubang kanasuran sa dili pagsulod sa giangkon niining teritoryo sa South China Sea.

Hagbay ra nga nagpahimangno ang China nga paglapas sa soberentiya niini ang paglawig sa unsa mang warship sa Amerika sa teritoryo niini sa South China Sea. Gani, daghan nang okasyon nga giabog niini ang mga barkong pangisda sa Pilipinas ug Vietnam.

Nahisama na hinuon sa berdugo ang China. Tungod sa ka dako sa teritoryo nga giangkon niini sa South China Sea, mipalapad usab kini sa armadong kusog niini sa maong lugar. Gani, adunay giingong mga military bases nga gitukod ang China sa pipila ka isla nga giangkon niini.

Tungod lagi kay daghan sa internasyonal nga komunidad ang mitan-aw sa aksiyon sa China pag-angkon sa dakong porsiyon sa South China Sea isip paglapas sa teritoryo sa silingang kanasuran, nakadesider ang Estados Unidos nga testingan ang China pinaagi sa pagnabigar sa usa sa mga warship niini.

Hinuon rason sa Estados Unidos nga adunay freedom of navigation diha sa South China Sea tungod kay rota kini sa mga barko nga nagdala sa kalibotanong negosyo nga mokabat sa singko trilyones dolyares matag tuig.

Ug nagpasabot kini nga walay makababag sa Amerika pagnabigar sa mga barko niini sa maong lugar. Ug sa paglawig sa warship niini, wala gayud kini gihulga sa puwersa sa China nga nakabase sa mga isla.

Siguro dili kaako ang China pagpakigharong sa Amerika niining panahon nga daghan ang mikondenar niini sa pagsakop sa halos entiro nga South China Sea. O basin nagpanuko kini pagsita sa US warship tungod kay nakita niini nga dehado kini kun moulbo ang dakong gubat tali niini ug sa Amerika.

Siguro makaingon kita nga maayo lamang diay ang China nga moabog sa mga barko gikan sa Pilipinas ug Vietnam nga mosulod sa giangkon niining teritoryo. Apan kun ang warship na gani sa Amerika, mora man og mibahag ang ikog.