EDITORYAL - Bullet Proof

“Bullet proof” usa ka paagi aron maproteksyonan ang tawo gikan sa epekto sa bala nga gipunting kanila, gisaligan kini sa mga law enforcers ug militar aron sila mabuhi ug makauli pa sa ilang mga pamilya.

Apan dinhi sa Pilipinas, adunay laing kahulogan ug gamit ang bullet proof, ug kini dili lamang mga law enforcers ug sundalo karon ang naggamit, ang mga Overseas Filipino Workers, Balikbayans, lokal ug turistang langyaw, ug ordinaryong pasahero nga mosakay og abyon agi sa mga tugpahanan sa nasud.

Sukwahi sa naandang bullet proof nga sul-obon o imuntar sa mga sakyanan, nipis nga plastic, packaging tapes, kandado maoy gigamit niining mga bag-ong "bullet proof" users kay nahadlok silang tamnan og bala ilang mga bagahe ug matanggong diha sa airport.

Tiaw mo ba nang padung ka molarga aron manarbaho sa gawas sa nasud alang sa imong pamilya apan tungod lang sa usa ka bala nga gitanom mamatay ang ilang kaugmaon?

Bati man kini paminawon apan nausab na gyud ang pamati sa mga pasahero sa ilang paggikan ug pag-abot sa mga tugpahanan sa Pilipinas tungod niining "tanim bala" nga modus operandi.

Dili usab makatarunganon ang nanggawas sa social media nga nibasol kang Pres. Aquino sa nahitabo karon sa mga tugpahanan tungod kay di man siguro ang pangulo maoy nagtanom niining mga bala.

Ang kinahanglan mao ang pagpanubag sa mga anaa sa tugpahanan lakip na ang mga law enforcements agencies kun nganong wa silay nahimo aron maputol na kini nga binuang.

Apan mentras nga walay nahimo ang mga otoridad batok niini mas maayong mangita og paagi ang mga pasahero aron sila ug ang ilang mga bagahe maproteksyonan.