Kanus-a likayan ang ahos

Dili sa tana'ng higayon nga maayo gamiton ang ahos, kay duna sad ni'ng negatibo nga epekto sa panglawas. Sama pananglitan;

* Kun ikaw usa ka 'yoga practitioner'-dili ni maayo gamiton ang ahos kay ang nagyoga -  nagkinahanglan nga linawo'ng ipaubos ang hunahuna nga pahinayon o pakalmahon, aron makapukos sa pamalandong sa kaugalingon.

Sukwahe sa ahos, kun mokaon ka ini, moabtik ang metabolismo mo, nga mora ka'g nahigmata sa kahiamgo, kay napukaw ang luyaho'ng mga 'nerves' o kaugatan. Mopadasig nga baskogon ang panghunahuna ug ang galamhan. Busa dili kini maayo sa nagyoga ang ahos kay makadisturbo kini sa iyang gibuhat.

Matud ni Bernard Jensen, usa ka ilado'ng Amerikano nga mananambal ug herbalista, niya pa, ang ahos kun kaonon subra sa 1ka buok (bulbs) sud sa 1ka adlaw, sa taas nga panahon, makasamad sa agianan sa pagkalibang, sa ubang mga tawo.

Nipahimangno sab siya nga dunganan kini sa laing pagkaon, aron dili kabuhion ug ma-ulser. Kadto'ng duna'y 'colitis' o impektado'g colon, pagsulay una'g ginagmay kun di ba mosakit.

Usahay sad sa ubang okasyon, maka-anemia kini ilabi na niadto'ng mga masakiton na, kay nangadaut na ang selyula'ng dugo.

Matngoni lang, nga dili kanunay mahikapan o masaghiran ang duga sa ahos, kay makahilos o makasunog kini sa atong panit.

Sa laing bahin, kadtong gusto'ng motanom og ahos, pili-a ang yuta nga tabunok o itomon.  Mas maayo ang composed nga yuta kay daghan ni'g nutrens. Bisibisi una ang yuta, dayon itisok ang mga lusok sa ahos, sa gilawmo'ng 5-8cms, nga distansyado'g tag 2ka pulgadas.

Bisbisi'g maayo panahon sa ting-init kada 8-10ka adlaw. Ayaw pabuwaka o palisoha ang tanom kay momenus ang nutrens sa ahos. Kun hapit na anihon, di na buboa'g tubig aron igo'ng mauga.