Pagkamakauulaw!

Kini ang imahen karon sa Pilipinas, dili lang kanato nga mga Filipino, kun dili labaw sa tanan sa uban nga kanasuran gumikan sa init nga isyu sa "laglag bala" nga gituohan nga binuhatan sa usa ka sindikato nga naglambigit mismo sa mga tawo ug posible pa gani mga opisyal sa Ninoy Aquino International Airport (NAIA).

Only in the Philippines nga ang mga pasahero nga moagi sa naasoy nga tugpahanan ipaputos og plastic ang mga dala nga bagahe ug markahan pa gyud nga gihimo kini nila kay dili sila gusto mabiktima sa modus sa “laglag bala.”

Hilabihan ka bati kaayo nga talan-awon nga makita sa airport apan dili kita makabasol kun ma-paranoid ang mga pasahero sanglit ang ilang kaugmaon ug sa ilang pamilya ang nakataya simbako mabiktima sila sa naasoy nga tinonto.

Ang labing ulahi nga giingong nakasinati sa laglag bala mao ang usa ka 65-anyos nga lola nga moadto lang unta sa Singapore aron mosud-ong sa duwa sa iyang apo apan wala mahinayon kay nakuhaan og bala ang iyang dala nga bag.

Samtang ang Aviation Security Group of the Philippines mibarug nga imposible nga mahitabo ang “laglag bala” sa airport dungan sa pag-insister nga walay sindikato nga nagpaluyo niini.

Argumento nila nga nabatasan na sa mga Filipino ang pagtuo sa anting-anting, ug usa niini mao ang pagbaton og bala. Pagkamabaw na lang gyud sa rason sa AVSEGROUP.

Ang mga buang lang tingali ang morisgo sa iyang kaugmaon sa pagdala og bala sa airport nga nasayod na silang daan nga sa X-Ray machine sigurado na sila nga masakpan.

Dinhi sa Sugbo mura’g wala man ta makadungog nga adunay mga reklamo gikan sa mga pasahero nga nabiktima sa laglag bala, maayo unta kun wala. Apan bisan pa man niini madalahig gihapon kita sa dako nga kaulawan.

Usa sa maapektohan niini mao ang turismo kay segurado ang mga turista mahadlok na mobisita sa Pilipinas kay basin sila ang sunod nga mabiktima.

Biktimahon man gani ang mga kadugo nga Pinoy bugti sa peso nga salapi, ang mga turista pa kaha nga nagbalon og dolyares.