EDITORYAL – Downtown paalegrehon?

Ang kagamhanan sa dakbayan sa Sugbo nagtinguha nga mahimong moalegre pagbalik ang dalan Colon ug ang ubang mga dapit dinhi sa downtown area.

Adunay programa si Mayor Michael Rama nga gitawag niya og Downtown Revitalization Project aron kuno madasig ang mga tawo sa pagsuroy diha sa kinapusorang dapit sa dakbayan.

Dili ikalimod nga menos na lang kaayo ang mga tawo nga mosuroy diha sa mga tindahan sa downtown area tungod sa pagkamugna sa dagkong mall sa ubang mga dapit sa siyudad.

Samtang gusto ni Mayor Rama nga madasig pagbalik ang mga tawo sa pagsuroy sa downtown area, apan wala niya makit-i ang pipila sa hinungdan nga nakapalaksot sa downtown area.

Daghang mga tawo nga adunay apan sa ilang panglawas nagbagulbol kay dili na “Friendly” kanila nga mga Persons with Disabilities (PWD) ang mga aseras sa dalan Colon ug sa uban pang bahin sa dakbayan.

Daghang mga gipangbutang nga semento nga nagbabag sa agianan nga bisan ang mga dili PWD, apan mga edaran na, maglisud sa pagtikang-tikang ug hinungdan nga anha na lang sila daplin sa karsada moagi.

Angay’ng sulbaron sa kagamhanan sa dakbayan kining kanunay nga paglunop diha sa downtown area kay mao kini ang rason nga ang ubang tag-iya og balay-patigayon nagmugna og koral aron dili masudlan og tubig-baha ang ilang tindahan kun adunay uwan.

Kinsa man kaha ang ganahan nga mosuroy sa mga department store diha sa downtown area nga kun dili ka makabantay nga adunay kusog nga uwan, dili ka na man makagawas kay gilunopan na ang mga aseras?

Problema kini nga angay’ng sulbaron sa kagamhanan sa dakbayan kun tinuod nga gusto sila nga moalegre pagbalik ang downtown area.