Puntos sa Pilipinas

Karon, ang maayong balita. Nakapuntos ang Pilipinas sa kaso nga gipasaka niini batok sa China sa Permanent Court of Arbitration nga nakabasi sa the Netherlands kabahin sa gikagubtan karon nga mga isla sa South China Sea.  

Matud sa arbitration court, aduna kini hurisdiksiyon sa kaso nga gipasaka sa Pilipinas batok sa China sa giingong pagsakop sa China sa mga isla nga sulod sa 200-nautical mile exclusive economic zone sa Pilipinas.

Kahinumdoman nga gipasaka sa Pilipinas ang kaso ngadto sa arbitration court kaniadto pang 2013. Hinuon, gibaliwala kini sa China tungod kay wala kunoy katungod ang maong internasyonal nga korte paghawid sa maong kaso.

Gusto man gud sa China nga resolbahon lamang niini ug sa Pilipinas pinaagi sa negosasyon ang problema sa teritoryo. Apan nagdumili ang atong kagamhanan ug nga gipili niini nga modangop ngadto sa maong arbitration court.  

Husto ang lakang sa atong kagamhanan. Ang maong internasyonal nga korte ang angay nga mohusay sa maong territorial dispute. Kay kun misugot pa ang Pilipinas nga makigsabot sa China, sama ra kita nga giluto sa atong kaugalingon nga mantika.

Sa pagpasaka sa Pilipinas sa maong kaso didto sa arbitration court, nagsunod lamang ang atong kagamhanan sa lagda sa United Nations Convention on the Law of the Sea, diin apil sa mga signatories ang Pilipinas ug China.   

Karon, midaug sa unang hugna ang Pilipinas. Magpadayon gayud ang arbitration court paghusay sa maong kaso. Ug hinaut nga magpadayon usab kining suwerte sa Pilipinas ug nga modaug gayud kita batok sa klarong pangilog sa China sa atong teritoryo.

Hinuon kining bag-ong kalamboan nagpakita lamang nga nagtakilid na ang China sa sitwasyon karon. Bisan pa man sa gahi nga baruganan niini, posible nga ang internasyonal nga komunidad makaingon nga sipyat gayud ang China sa walay klarong basihan niini nga pag-angkon sa pipila ka isla sa South China Sea.

Ang desisyon sa arbitration court posible usab nga makapaagni sa ubang claimant sa South China Sea pagpasaka og kaso batok sa China. Kun mahitabo kana, mapugos na kaha ang China pagkagiw gikan sa mga isla nga giangkon niini?