Padayon ang kaayohan

Mao kini ang pasalig ni Mayor Michael Rama ngadto sa mga senior citizens atol sa culmination program pagtak-op sa pagsaulog sa Senior Citizens Month sa dakbayan sa Sugbo.

Ang pasalig sa mayor ngadto sa mga senior citizens nagsilbe nga iyang birthday gift kay nagsaulog man siya sa iyang adlaw’ng natawhan kaniadto’ng miaging adlaw.

Matud sa mayor nga magpadayon ang paghatag og P12 mil nga cash assistance sa mga matag senior citizens matag tuig, taliwa sa pangangkon sa iyang mga kaatbang nga kuno wala na’y salapi ang dakbayan.

Gawas sa maong cash assistance, aduna pa’y dugang mga kaayohan ug mga benepisyo nga mapaabot sa mga senior citizens sa dakbayan gikan sa City Hall.

Kini, pagmatuod nga pinangga ug nag-una sa kasingkasing sa Rama administration ang mga senior citizens.

Si Doming Chaves, OSCA head ning dakbayan, mibutyag nga sama sa nangagi nga kasaulogan, pasidunggan unta ang mga centenarians.

Apan karong tuiga, aduna unta’y upat nga miabot na og 100 ang pangedaron, apan wala kahatagi sa P100 mil nga award gumikan sa pagdumili sa Konseho pagpasar sa Supplemental Budget No. 1.

Sa ato pa, ang upat ka centenarian maghuwat kun kanus-a makonsiyensiya ang Konseho pagpalusot sa Supplemental Budget No. 1.

Ug kay nasudlan man sa politika ang pagpalusot sa maong supplemental budget, lagmit ang paghuwat sa mga centenarian sa ilang pasidungog molanat pa hangtud tapus sa eleksyon.

Ug sa Search for Model Senior Citizens Organization for 2015, ang Barangay Apas 1 pinangulohan ni Urbana D. Tejano maoy nakakuha sa Unang Ganti uban sa P50 mil nga award.

Gisundan kini sa Barangay Cogon Pardo (Atty. Felix Aliño, president); Adlaon (Luzviminda Janssen, president); San Antonio (Lourdes Perez, president); San Jose (Rolando Basirgo, president); ug Talamban (Job Sarmago, president).

Ang mga consolation prizes, sa tag P2 mil naangkon sa mga Barangay Apas 2, Basak-San Nicolas, Budlaan, Hipodromo, Inayawan, Barangay Luz, Quiot, ug Sambag 1.

Mga president sila si Conchita Lugo, Victoria Tabada, Rosita Macachor, Cecilia Olita, Amera Traboc, Gaudencio Timaan, Juanita Sering, Rosalia Mialda.

Ang total nga cash prizes mikabat og P146 mil. Ang mga evaluator, sila si Marven Ecarma sa DILG; Pedro Cuizon, Mayor’s Office/BAO; Flora Bering, DSWS; Domingo Chaves, OSCA Head.

Criteria for judging: Activities/programs undertaken; Legal documents submitted, Financial records, Utilization of the 1% allotment from the IRA; ug Related Training/Seminars attended.

Matud ni Chaves nga kining maong mga pagpasidungog “will strengthen the structure, which is the foundation of the Senior Citizens organizations.”