EDITORYAL - Kampanya batok kurapsyon

Gipasakaan og kaso ug adunay gipangtaktak sa trabaho ang Ombudsman ang ubay-ubay nga mga opisyales  sa Philippine National Police tungod sa ilang kalambigitan sa kurapsyon sa pagpamalit og mga gamit alang sa kapolisan ug sa mga transaksyon nga naalkanse ang katawhang Pilipino.

Dihay anomaliya sa paghatag og lisensya sa kontrobersyal nga AK-47 Rifles nga na-trace diay nga atoa na sa mga kamot sa New People’s Army didto sa Luzon ug ang uban didto na sa Mindanao narekober human sa engkwentro .

 Gawas nga nailad ang gobiyerno, gigamit usab kining mga armas  pagpatay sa mga sundalo ug polis ug gigamit pagpanghulga ngadto sa mga sibilyan.

Laing anomaliya nga giimbestigar ug nahukman sa buhatan ni Ombudsman Conchita Morales mao ang pagpamalit og mga rubber boats sa PNP nga nasakpang daghang nalapas nga probisyon sa Procurement Law sa Pilipinas ug naalkanse na hinuon ang gobiyerno aron paboran ang usa ka kompanya.

Dili na mahinganlan dinhi ang tanang mga nalambigit nga opisyal nga naglakip sa mga heneral, koronel sa PNP apil na ang mga non-uniformed personnel ug sibilyan tungod sa ilang gidaghanon.

Gawas sa PNP, aduna pay mga sakop sa AFP, ubang ahensiya sa gobiyerno, bisan na gani ang pipila ka sakop sa kabinete sa Malacañang ug nagkadaiyang local government units ang nag-atubang og susamang mga kaso tungod sa pagpangawkaw.

Angay lantawon ang mensahe niini ngadto sa tanan. Wala diay nagmika ang atong gobiyerno ilabi na ang Ombudsman aron bantayan ug gukdon kadtong mga kurakot nga nibulsa sa kwarta sa katawhan.

Wa magkinahanglan ang Pilipinas og lider nga popular, sikat, nag-trending, ug maayong manabi. Ang kinahanglan mao kadtong hilom motrabaho ug wa maghuna-huna sa iyang personal nga interes kondili ang interes gyud sa iyang ginsakupan ug labaw sa tanan dili kawatan.