Minilyon sa basura

Kun si Senador Miriam Santiago ang pasultihon, sila rang duha ni Mar Roxas ang klaro nga magkaatbang sa eleksyon unya 2016.

Gihimo nga rason ni Miriam ang Plunder case ni VP Jejomar Binay nga posibleng mapasaka na sa Sandiganbayan sa dili madugay.

Unya si Senador Grace Poe matangtang usab sa Senado kay dili Filipino ug maapektahan ang iyang kandidatura pagka-presidente. Ibutang ta og mahitabo ang pangagpas ni Miriam, dako’ng pangutana  ang iyang stage 4 nga cancer sa baga.

Makasugakod ba kaha si Miriam kun mag-one-on-one sila ni Roxas? Ang pagpangampanya pagka-mayor dili man gani lalim, unsa na kaha sa pagka-presidente?

Kuyaw hinoon og makakatawa lang ang kampo ni Binay ug Grace ning pangagpas ni Miriam. Mikatap ra ba sa Facebook ang litrato nilang Binay ug Chiz Escudero, ang ka-tandem ni Grace, nga nag-meeting sa Davao.

Apan wala ko kaagwanta kay nakakomentaryo ko nga nagsud-ong sa litrato nga “nag-abot ang traydor ug ang benepisyaryo.”

* * *

Nalisang ko nga nagbasa sa balita sa The Freeman niadtong Domingo kalabot sa pagsubasta sa garbage disposal service sa kagamhanan sa siyudad sa Sugbo nga nagbalor og P47 milyones.

Gihimo ang bidding nga wala pa kaaprobahi sa Konseho ang P3.32 bilyones nga Supplemental Budget 1.

Kinahanglan ipakita sa administrasyon ni Mayor Mike Rama kun giunsa nila paggasto ang P51 milyones nga budget alang sa paglabay og basura. Nganong mangayo pa man og P47 milyones nga aduna na man untay P51 milyones alang niini?

Ang rason sa kampo ni Mike, nahurot na kuno ang P51 milyones. Apan daghan ang nagduda giunsa kini paghurot. Dayag man ang kahugaw sa mga barangay kay wala matarong og hipos ang mga basura, ilabi na ang mga sitio, ug sumala pa nga ang giseguro mao ang mga dagko’ng establisamento.

Maayo tingale nga mohatag si Mike og kwentada asa paingon ang P51 milyones una siya mangayo og dugang P47 milyones para lang sa basura. Hapit na man gud ang eleksiyon, mao na nga magbantay kita nga dili magamit sa kampanya ang kuwarta sa siyudad.

* * *

Sige nga gibalikbalik ni Kongresista Luigi Quisumbing ang termino nga “sakripisyo” ning iyang pagdagan pagka-mayor kontra sa makimasa nga si Konsehal Lolypop Ouano-Dizon.

Tinuod nga sakripisyo, apan dili tinuoray nga sakripisyo kay gituman man niya ang gusto sa usa ka tawo. Nasayod man si Luigi nga gilawog ra g’yud siya sa tirong ni Mayor Jonas Cortes.

Hinuon, dili bastabasta kining mga Quisumbing. Mogasto g’yud kini sa eleksiyon. Gani makausa, si Luigi gipilde ni Nerissa Soon-Ruiz bisan nagbayad kini og minilyon sa grupo ni Lito Banayo. Karon, pinaksitay g’yud sa kuwarta ang mga Quisumbing aron suklan ang nakadulot na sa mga barangay nga apo ni Ingko Pedong.