Polis protektor sa ilegal swertres

Aron masulbad ang ilegal nga swertres nga nakigkompetensiya sa swertres sa lotto, ang Philippine Charity Sweepstakes Office (PCSO) mipadagan og Small Town Lottery lukop nasud.

Aron adunay makadumala niini, ila kini nga gipadagan pinaagi sa prankisa. Ang naghupot sa prankisa nagsugod na sa pagpadagan sa ilang negosyo ug ang bola sa small town lottery anaa kini pagahimoa sa dakbayan sa Mandaue.

Ang bola sama sa oras sa suwertres lotto makatulo sa usa ka adlaw. Gihimo kini matag 11:00 sa buntag, alas 4:00 sa hapon ug alas 9:00 sa gabii.

Apan miangal karon ang naghupot sa prankisa sa Small Town Lottery sa PCSO kay migrabe ug naghitak na hinuon pagmaayo ang ilegal nga swertres dili lang sa lalawigan sa Sugbo, kun dili, apil na dinhi sa dakbayan ug gipasagdan ra kini sa mga polis.

Ang rason? Gibuhi ang mga polis sa mga financers sa ilegal nga swertres. Nagtuo pa ko nga tarong ug buotan si Senior Superintendent Noel Gillamac ug Superintendent Romeo Santander sa ilang pagka opisyal sa kapolisan sa lalawigan ug dakbayan.

Mao nga ako manghinaot nga dili unta nila wagtangon ang akong pagtuo sa ilang pagkatarong ug pagkabuotan nga opisyal sa kapolisan.

Kami nga mga gagmay nga tawo sa katilingban nagpaabot sa resulta sa inyong kampanya batok sa ilegal nga swertres.

Magpahinumdom lang pud ko nga ang kabahin sa suweldo ug benepisyo nga inyong nadawat isip opisyal sa kapolisan gikan na sa bayad sa mga nakapalit sa prankisa sa Small Town Lottery sa PCSO.