EDITORYAL – Pagpabaya sa katungdanan

Ang kadanghag, pagpasagad ug ang subra nga kumpiyansa maoy sagad gayud nga hinungdan sa mga aksidente sa kadalanan nga moresulta og pagkakalas sa daghang kinabuhi sa mga inosente’ng katawhan.

Dili ikalimod nga daghang drayber sa mga public utility vehicles sama sa jeepney ug bus ang mura na og sila maoy tag-iya sa karsada kun mopadagan sa gimaneho nila nga sakyanan.

Daghang mga drayber og bus pasaheroan nga abusado kaayo nga mopadagan ug ilang sugaton ang mga gagmay nga sakyanan bisan og wala na sila magsubay sa tukma nila nga agianan.

Nag-anad kining mao nga abusado’ng drayber kay unsaon, ang mga sakop sa PNP Highway Patrol Group (HPG) ug Land Transportation Office (LTO) wala man gyud mohimo sa ilang katungdanan.

Suwerte na kaayo kun sa imong pagbiyahe diha sa mga national highways makakita ka og sakop sa HPG nga nag-atang aron dakpon kadtong mga abusado nga drayber.

Kun ang mga sakop niini’ng mao nga ahensya sa kagamhanan nagtuman pa sa ilang katungdanan, sigurado nga mapitol unta ug magpanagana ang mga drayber sa pag-abuso sa ilang pagmaneho.

Sagad g’yud nga brake dayon ang pasanginlan nga hinungdan sa mga aksidente ug tagsa ra kaayo nga ang hingtungdang drayber moangkon sa iyang sayop nga misangpot sa aksidente.

Adunay gilatid nga gibug-aton ang usa ka sakyanan ug kun pasubrahan kini og mga pasahero unya kusog ang pagpadagan ug kalit ang pagtamak sa brake, ang rubber cap sa brake mobuto kay dili na makapiog sa gibug-aton.

Tingali adunay pipila ka drayber nga wala masayod niini, apan may nasayod usab apan subra ang kumpiyansa ug unya ra magmahay sa hilom kun mahitabo na ang aksidente