Joint medical mission

Nagmalampuson kagahapon ang gihimong Unified Medical and Civic Action Mission sa Mary Help of Christians School. Kining maong kalihukan tipik sa pagsaulog sa kapistahan sa Our Lady of the Holy Rosary Parish sa Inayagan, Minglanilla, Cebu ubos sa pagdumala ni Fr. Omen Mahusay.

Dul-an sa usa ka libo ka tawo gikan sa mga barangay Inayagan ug Tunghaan, Minglanilla ang nahatagan og libre’ng medical, dental, optical, surgical, psychological, spiritual, massage, storybook reading sa mga bata ug tupi.

Gihimo kini sa hiniusang kusog sa mga Reservists sa Philippine Army, Navy ug Air Force. Tungod kay unified medical mission kini, ang tulo ka Reservist Units nga nagtambayayong mao ang 1901st Infantry Brigade Ready Reserve ubos ni Colonel Erik Espina, 5th Air Force Wing Reserve ubos ni Brigadier General Cornelo Pelaez, ug Naval Force Eastern Visayas Reserve ubos ni Commander Aldrin Cuña ug 511th Naval Reserve Squadron. Miabag usab ang 5th Technical and Administrative Service – Dumaguete ug Civil Military Affairs Group sa AFP Reserve Command.

Ang tambal nga gipang-apud-apod sa mga tawo naggikan sa Cañedo Equity Ventures ug mga sakop nga mga korporasyon niini ubos sa pagdumala ni Lumen Cañedo ug ang Catholic Women’s League sa Minglanilla ubos ni Narding Selma.

* * *

Tipik lang sa ordinaryo nga rotation ang gihimo nga pagpuli sa 2nd Special Forces Battalion sa Bohol sa bag-ong unit nga mao ang 47th Infantry Battalion nga ubos sa pagdumala ni Colonel Jose Dodjie Belloga Jr.

Si Lieutenant General Nicanor Vivar, ang commander sa Central Command, sa press conference uban ni Gobernador Edgar Chatto, nagkanayon nga walay kalabutan ang petisyon sa mga militante nga pundok sa Bohol sa pagpuli sa 47th IB sa 2nd SF Battalion. Ang 2nd SF Battalion anaa na karon sa Surigao.

Miyerkules niadtong miaging semana, nakatambong ko sa send-off ug welcome ceremony nga gihimo sa Tagbilaran. Gikan sa Mactan Benito Ebuen Air Base sa Mactan, uban sa pipila ka sakop sa media, 3rd Civil Relations Group, ug mga sakop sa Central Command pinangulohan ni Lt. Gen. Vivar, nanakay kami og Huey helicopter paingon sa airport sa Tagbilaran, ug pagkahapon balik sa Mactan.

Adunay mga balita nga nagmaya ang mga militante’ng pundok sa Bohol sa pag-atras sa 2nd SF Battalion. Apan ang wala nila mabantayi nga gipulihan ra diay sa Armadong Kusog sa Pilipinas ug infantry unit aron maoy mopadayon sa gibilin nga “achievement” sa 2nd SF Battalion nga mao ang dul-an sa walo ka tuig nga “insurgency-free” Bohol.

Si Chatto sa iyang bahin nagkanayon nga paninguhaon nila nga mapadayon nga “insurgency-free” ang Bohol aron magpadayon ang socio-economic activity sa maong probinsiya.

Ang kalamboan dili maangkon kun adunay insurhensiya sa usa ka lugar.