Pagpalit og away

Kitang tanan adunay iya-iyang kawsa ug mga hagit nga gisagubang. Apan makatarunganon ba nga mopalit ka sa away sa uban nga wa’ gani ka hingpit masayod sa estorya ug sa sinugdanan sa away?

Samtang nagsakay mi og taxi  sa akong kauban sa trabaho, sa among kilid diha’y Toyota Innova, kansang driver nangabli sa bentana ug maisugong nanudlo.

Didto kini nahitabo sa utlanan sa Barangay Kasambagan, sa dayong pasulod sa dakbayan sa Mandaue padulong sa fly-over sa Wireless.

Nagtuo ko nga may gikaestorya lang siya sa atbang nga dalan nga may vulcanizing shop kay nanan-aw man niya ang mga nagtrabaho. Apan ang taxi driver diay nga nag-una kanamo ang iyang gikasab-an.

Ang taxi driver, bisan kun sirado ang iyang sakyanan, nagsige usab sa pagyawyaw ug nakiglalis sa driver sa Toyota Innova.

Pipila ka segundos kalit nga gisirad-an sa taxi driver ang agi-anan sa Toyota Innova. Samtang ang taxi driver sa among gisakyan kalit ‘sab nga nibabag sa Toyota Innova hinungdan nga nababoy ang Innova nga ang driver nagsige gihapon sa pagyawyaw.

Ang taxi driver nga iyang giyawyawan isog nga migawas sa taxi ug nipadulong sa driver sa Innova, samtang ang taxi driver ‘sab sa among gisakyan kalit nga ni-brake aron mababagan ang Toyota Innova.

Sulod sa among gisakyan emosyonal siya nga nisulsol sa taxi driver  nga kulatahon ang driver sa Toyota Innova. Naglagot ang driver sa gisakyan namo nga taxi kay alang niya abusado ang driver sa Toyota Innova.

Matud niya kusog nga mang-lock ang driver sa Toyota. Ang yawyaw ni Manoy driver, "abusado g’yud mo nga mga datu, nagsalig mo nga datu mo? Pareho ra ta nga mangamatay!"

Samtang maisogon siya nga nagyawyaw, pugoso na siya nga nidala sa manobela nga sa akong sabot gusto siyang manaog aron motabang sa pagkulata kun magkasinumbagay g’yud ang taxi driver ug ang driver sa Toyota Innova. Busa, ako na siya nga gisultihan sa pagtarong sa iyang pagmaneho ug sa pagpadayon na sa pag-drive tungod kay duna siya’y mga pasahero. Samtang ang duha ka driver naglalis na.

Didto na medyo nikalma si Manoy driver ug wala na magtingog hangtud nga niabot mi sa ABS-CBN station.

Samtang nagdagan ang taxi nga among gisakyan nakapangutana ko sa akong kaugalingon lang, (wala na ko mangutana ni Manoy driver kay diha pa siya sa iyang kalagot niadtong higayona) ngano nga ingon niadto ang iyang simpatiya sa laing taxi driver?

Ang duha ka sakyanan kalit lang nitapad ug niuna kanamo taliwa sa naghuot nga mga sakyanan. Didto pa kami nakabantay nila.

Husto ba ang suway nga pagpalit ni Manoy driver sa away sa laing taxi driver nga wala gani siya hingpit masayod sa estorya?

Mao ra ba ni ang sagad rason nga mahitabo ang wala’y kuwenta nga pinatyanay tungod kay mopalit lang og away.

Ang nakapasalikwaot, tungod kay kun duna’y mga makatarunganong away nga kitang tanan, angay unta manginlabot, anha pa motalaw ug mobahag ang ikog.